Хабарингиз бор, ОФК Шарқ минтақаси плей-офф ўйинларини август ойида, Ғарб минтақаси плей-офф баҳсларини эса кейинги йил февраль ойида ўтказишга қарор қилганди.

Шарқ минтақаси финалида Кореянинг "Чонбук Хюндай Моторс" ва Япониянинг "Урава Ред Даймондс" клублари тўқнаш келишди. "Саитама 2002" стадионида ўтган, эронлик Алиризо Фағони бошқариб борган баҳсда ҳисоб 11-дақиқада японияликлар вакили Юсуке Матсуо томонидан очилди - 0:1. Учрашувнинг 55-дақиқасида Син Хо Пайк пенальтидан тўп киритиб, ҳисобни тенглаштирди - 1:1. Асосий вақтда бошқа гол урилмади.

Қўшимча таймлар тугаётганда дастлаб Гё Вон Хан "Чонбук"ни олдинга олиб чиқди, 120-дақиқада эса Каспер Юнкер ҳисобни тенглаштирди - 2:2. Пенальтилар сериясида омад "Урава"га кулиб боқди - 3:1.

"Чонбук Хюндай Моторс" - "Урава Ред Даймондс" 2:2 (Пенальтилар серияси: 1:3)
Голлар: Син Хо Пайк 55, Гё Вон Хан 116 - Юсуке Матсуо 11, Каспер Юнкер 120.

Шу тариқа "Урава Ред Даймондс" ўз тарихида тўртинчи бор Осиё чемпионлар лигаси финалига чиқди. 2007 ва 2017 йилларда финалда ғолиб бўлган мазкур клуб, 2019 йилги ҳал қилувчи баҳсда имкониятни бой бериб қўйганди.

Эслатиб ўтамиз, бу мавсумдаги ОЧЛ финали 2023 йилнинг 19 ва 26 февраль кунлари бўлиб ўтади.

Осиё чемпионлар лигаси. "Урава Ред Даймондс" ирода кўрсатиб финалга чиқди!