Унда ОФК Ижроия Қўмитасининг Марказий Осиё минтақаси вакили, ЎФА биринчи вице-президенти Равшан Ирматов ҳам иштирок этди.

Кун тартибига кўра, ОФК Ижроия қўмитасига вакилат муддати 2023-2027-йилларни ташкил қилувчи янги аъзолари сайлади. Хусусан, тожикистонлик Мижгона Маҳмадалиева ОФКнинг Марказий минтақа бўйича аёллар ижроия қўмитаси аъзоси, Корея Республикасидан Чунг Монг Гю эса Шарқий минтақа бўйича ОФК Ижроия қўмитасига сайланди.

Бундан ташқари, Конгресс ОФК Низомининг 32.8 ва 32.9-моддаларига оид бир қанча аъзо ассоциациялардан келиб тушган таклифларни маъқуллади.

“ОФК бошқарув соҳасида ажойиб ютуқларга эришди ва бизда сўнгги ўн йил давомида биргаликда қурилган мустаҳкам пойдеворлар учун аъзо ассоциациялар ва минтақавий ассоциацияларга миннатдорчилик билдирамиз. Ушбу мустаҳкам пойдевор ва бирдамлик бизга шу йил охирида жорий этиладиган, келаси ўн йилликда Осиё клублари ўйинида инқилоб қиладиган янги клуб ислоҳотларини ўтказишимиз учун йўл очди”, деди Шайх Салмон.

Конгресс давомида, шунингдек, ташкилотнинг 2023-йил якунлари бўйича молиявий ва аудиторлик ҳисоботлари тасдиқланди.

Осиё Футбол Конфедерациясининг 34-Конгресси бўлиб ўтди