Савол: Тим Кэйхилл 2016-2017 йил қайси клубда фаолият олиб борган?

Жавоб: Футболчилик фаолиятини Англия, АҚШ ва Хитойда ўтказган Тим Кэйхилл 2016 йил ўз ватанига қайтиб, икки мавсум "Мельбурн Сити" жамоасида тўп тепган.

Савол: Осиё Кубогида энг кўп ғолибликни қўлга киритган терма жамоа қайси?

Жавоб: Япония. Япония терма жамоаси шу пайтгача тўрт бор (1992, 2000, 2004, 2011) қитъа биринчилигида зафар қучган. Саудия Арабистони билан Эрон ҳисобида учтадан олтин медаллар бўлса, Жанубий Корея икки бор Осиё Кубоги ғолиби деб топилган.

Савол: Бу қайси стадион?

Жавоб: Бу Таиланд чемпионати вакили "Муангтонг Юнайтед" стдаиони бўлиб, Банкок ташқарисида жойлашган. Стадион ўз бағрига 15 минг мухлисни сиғдиради. Хабарингиз бор, Сардор Мирзаев ҳозирда ушбу клубда тўп тепяпти.

Савол: ОФК Кубогида энг йирик ғалаба қачон рўй берган?

Жавоб: Энг йирик ғалаба ўтган йил Вьетнамнинг "Ханой" ва Камбоджанинг "Нага Уорлд" клублари ўртасида кечган баҳсда кузатилди. Бунда "Ханой" клуби 10:0 ҳисобида зафар қучди.

Савол: Аёллар ўртасидаги Осиё чемпионати энг кўп қаерда ўтказилган?

Жавоб: Гонконгда. Бу давлат шу пайтгача тўрт марта (1975, 1981, 1986, 1989) мазкур мусобақага мезбонлик қилган.

Савол: Сами Ал Жабер нечта жаҳон чемпионатида иштирок этган?

Жавоб: Тўртта. Саудия Арабистони афсоналаридан бири Сами Ал Жабер 1994 - 2006 йиллар оралиғида ўтказилган барча тўрт мундиалда иштирок этган. Шунингдек у 1994, 1998, 2006 йилги жаҳон чемпионатларида гол ҳам урган.

Савол: Нечта жамоа ОЧЛ гуруҳ босқичидаги ҳамма ўйинларда ғалаба қозонган?

Жавоб: Тўртта. Қатарнинг "Ал Дуҳайл" клуби 2018 йил барча олтита ўйинни ғалаба билан якунлади. Бундан ташқари Хитойнинг "Шандонг Луненг" (2005), Жанубий Кореянинг "Пусан И-Парк" (2005) ва Япониянинг "Кашима Антлерс" (2010) клублари ҳам ўз пайтида гуруҳдаги ҳамма ўйинларда ғолиб бўлишган.

Осиё футболи ҳақида билишимиз керак бўлган маълумотлар