Атиги уч кундан кейин БАА - Баҳрайн учрашуви билан навбатдаги Осиё Кубогига старт берилади. БАА пойтахти Абу Дабидаги "Zayed Sports City" стадиони мусобақанинг ҳам очилиш, ҳам финал баҳсига мезбонлик қилади. Мазкур стадион сиғими 43,000 мухлисга мўлжалланган бўлиб, ўйингоҳ Абу Даби халқаро аэропортидан 20 км. узоқликда жойлашган.

Абу Дабида яна битта стадион мавжуд бўлиб, "Mohammad Bin Zayed Stadium" деб номланади ва сиғими 40,000 ўриндиққа эга. Бу ўйингоҳда футболдан ташқари баъзан крикет беллашувлари ҳам ўтказиб турилади. Абу Дабидаги учинчи стадион "Al Nahyan Stadium" деб номланади ва бу ерда бешта учрашув ўтказилади.

Осиё Кубоги ўйинларига Дубайдаги иккита стадион мезбонлик қилади. "Al Maktoum Stadium" унчалик катта эмас. 15,000 мухлисни ўз бағрига сиғдира оладиган ушбу арена метрога жуда яқин жойлашган ҳамда бу ерда олтита ўйин ўтказилади. Дубайдаги иккинчи стадион "Rashid Stadium" бўлиб, бу ерда Ўзбекистон - Туркманистон учрашуви ўтказилади. Умуман айтганда бу ерда мусобақанинг 5та ўйини бўлиб ўтади.

Дубайдан узоқ бўлмаган Шаржадаги "Sharjah Stadium" 11,000 томошабинга мўлжалланган бўлиб, бу ерда 6та ўйин ўтказилади. Осиё Кубоги ўйинлари ўтказиладиган тўртинчи шаҳар эса Ал Айн. Бу ерда иккита стадион баҳсларни ўзида қабул қилади. Сиғими 25,000 бўлган "Hazza Bin Zayed Stadium" 8та учрашувга мезбонлик қилади. Бирмунча кичикроқ "Khalifa Bin Zayed Stadium"да эса 6та ўйин бўлиб ўтади. Ушбу арена ўз бағрига 16,000 ишқибозни сиғдира олади.

Осиё Кубоги-2019. Стадионлар мухлисларни қабул қилишга тайёр