Осиё Кубогининг энг сўнгги ярим финалчиси Ал Айн шаҳридаги "Хазза бин Зайд" стадионида ўтадиган баҳсдан сўнг маълум бўлади. Мезбон БАА амалдаги чемпион Австралия билан тўқнаш келади. Кўпчилик мазкур баҳсда яшил қитъа вакилларининг имкониятини баланд ҳисобламоқда, бироқ мезбонлар ўз уйида ўйнашини унутмаслик керак.

БАА
Очилиш ўйинида Баҳрайн билан қийин учрашув ўтказиб якунда 1:1 ҳисобидаги дурангга эришган БАА кейинги турда Ҳиндистонни 2:0 ҳисобида мағлуб этди. Гуруҳдаги сўнгги ўйинда Таиланд билан дуранг (1:1) мезбонларни 1-ўринни олишларига етарли бўлди. 1/8 финалда Заккерони шогирдлари Қирғизистон билан тўқнаш келишди. Қизиқарли ўтган учрашув қўшимча таймларга қадар давом этди. Якунда БАА 3:2 ҳисобида зафар қучиб чорак финалга чиқди.

АВСТРАЛИЯ
2015 йилги Осиё Кубоги соҳиби БААдаги мусобақани Иорданиядан учралган мағлубият (0:1) билан бошлади. Аммо кейин Фаластин (3:0) ва Сурия (3:2) мағлуб этилди. Гуруҳда иккинчи ўринни олиб нимчорак финалда Ўзбекистон билан ўйнаган Австралия пенальтилар сериясидагина ғалаба қозонди.

Ўйиндан олдинги фикрлар
Альберто Заккерони (БАА бош мураббийи): "Австралияга қарши ўйнаётган исталган жамоа рақиб Осиё Кубогини қўлга киритишга асосий даъвогар эканини билади. Ҳар бир мураббий ўз футболчиларидан келиб чиқиб тактика танлайди. Иордания ва Ўзбекистон асосий ҳимояни ўйлашди ва қарши ҳужумда ўйнашди. Биз эса кўпроқ ҳужумга асосланган ўйин намойиш этамиз. Стадионга кўплаб мухлислар келишини кутамиз ва ярим финалга чиқишга умид қиламиз".

Грэм Арнольд (Австралия бош мураббийи): "Ўзбекистон билан ўтган ўйиндан кейин йигитлар ўзларига келиб олишди. 120 дақиқа ва пенальтилар сериясидан сўнг футболчилар тўлиқ тикланишди. Ўйин учун таркибни одатда бир кун олдин тунда эълон қилардим, аммо ҳозир вазият бошқача. Асосий таркибни ўйин бўладиган кун тонгда маълум қиламан. Ўзбекистон кўпроқ Европа услубида ўйнади. БАА эса Сурия ва Фаластинга яқинроқ ўйнайди. БААни ҳурмат қиламиз. Тўла стадион БААга икки хил таъсир қилиши мумкин: уларни олдинга чорлаши ёки босим остида қолдириши".

Осиё Кубоги-2019. 1/4 финал
25 январь. Ал Айн. "Хазза бин Зайд" стадиони

БАА - Австралия
Бошланиш вақти: 21:00 (Тошкент вақти).

Осиё Кубоги превьюси. 1/4 финал. БАА - Австралия