Гап қайси футболчиларнинг қайси клубга ўтгани ҳақида эмас. Мутлақо! Мени бир нарса хайрон қолдирмоқда ва жаҳлимни чиқармоқда.

Янги футболчини таништираётганда клубларимиз тахминан мана шундай сўзларни ёзишади: "...Фалончи фалончиев билан шартнома тузилди. Умид қиламизки у мухисларимизни хкрсанд қилади ва янги мавсумда жамоамизга катта фойда келтиради..."

Барака топгурлар, футболчи билан неча йиллик шартнома тузилганини ёзиш қийинми ёки у ҳам махфий сирми? Ёки клуб раҳбари ёки бош мураббий шартнома муддатини ёзманглар, деб айтадими?

Одатда футболчи ва мураббийнинг маошини сўраганимизда, шартномада маошни ошкор қилиш мумкин эмаслиги ҳақида банд бор, деб жавоб беришади. Ўша шартнома қачонгача тузилганини ошкор қилса бўладими?

Чет элда 1+1 кўринишидаги шартномалар эълон қилинади, футболчи сотиб олиш ҳуқуқи билан ижарага олингани ёзилади ёки бу ўйинчи эркин агент сифатида жамоамизга келиб қўшилди, дейишади. Бизда-чи? "Пахтакор" ва АГМК каби клублардан ташқари бошқа ҳеч бир клуб бундай нарсаларни ёзмайди.

Баъзида футболчи бошқа клубга ижарага берилганини мавсум охирида билиб қоламиз.

Янги йил байрамлари тугаганидан кейин ПФЛ барибир қайси футболчи қанча муддатга шартнома тузганини эълон қилади-ку! Шундай экан, яширишдан нима маъно бор? Қачон бизда ҳам раҳбарият клуб матбуот хизматига профессионал ишлашлари учун имконият яратиб бераркан?

Ўзбекча трансферлар. Шартнома муддати ҳам ўта махфий сирми?