ЎФА анжуманлар залида давом этаётган танқидий руҳдаги йиғилишда сўз олган Лазиз Қўчқоров кескин фикрларни билдириб, энди натижага таъсир кўрсатган ҳакам бутун умрга футболдан четлаштирилишини маълум қилди.
"Кечаси соат 2 гача уйқу келмади. Ҳакамлик қилаётган сизларсизлар, аммо норозиликлар бизга келяпти. Ўйлайманки, бу одамгарчиликка ҳам тўғри келмайди. Сизлар (ҳакамлар – таҳр.) уйингизда, оила бағрида маза қилиб ухлаяпсизлар. Биз учун эса дам олиш кунлари ҳам татимаяпти.
Нега ўйинлар шанба-якшанба кунларига қўйилади биласизларми, ҳакамлар? Ҳамма маза қилиб ҳордиқ чиқарсин, мухлислар футбол кўриб, дам олсин, деган мақсадда қилинади. Сизлар бутун жамоа – ассоциация, ПФЛ, ҳакамлар маркази, инспекция, "Спорт" телеканали ва ОАВ билан ҳакамларга кўмаклашиб, жипс бўлиб ишлаймиз деганда, сизларни нима ҳаққингиз бор ўйинни бузишга? Бунга ким ҳуқуқ берди? Кимдир агар сизларга топшириқ бераётган бўлса, очиқ-ойдин айтинглар. Ким айтолади? Бунинг чегараси борми-йўқми?
Тўғри, телевидение, камера, VAR билан боғлиқ ўзига яраша муаммоларимиз бор. Бу нарсалар устида ишлаяпмиз, раҳбариятга таклиф билдиряпмиз. Лекин буларни амалга ошириш учун юзимизни ёруғ қилиб олишимиз керакми-йўқми?
Мухлислар норози. Ҳеч изоҳларни ўқийсизларми? Ҳамма сўккан, бирорта ижобий фикр йўқ. Шу ишга келганимдан бери унақа изоҳ ўқимадим.
Йиллар давомида ишонч йўқолган. Шу ишончни қайтариш учун ҳаракат қиляпмиз.
Сизлар чиқарган қарорни ҳеч ким тушунмаяпти. Биз қачон мақтов эшитамиз?
Кеча раҳбариятга таклиф киритдим. Тартиб-интизом кодексини кейинги йилдан ўзгартирамиз, уни ҳозирдан ишга туширдик. Энди ҳакамлар ўйин натижасига таъсир кўрсатадиган қарор қабул қилса, умрбод футболдан четлаштирилади. Гапирдимми, шу ишни қиламан", – деди Лазиз Қўчқоров.
Изоҳлар