Осиёнинг энг кучли футзал клубларидан бири ҳисобланган «Санае Гити Пасанд» жамоаси 23 октябрь, чоршанба куни Тошкентга етиб келади. Эронлик футзалчилар ташриф давомида бир қатор ўртоқлик учрашувларини ўтказишади. Жумладан, 24 октябрь куни Тошкентнинг «Бунёдкор» клуби «Санае Гити Пасанд»га рақиб бўлади.

26-27 октябрь кунлари «Санае Гити Пасанд» футзал бўйича Ўзбекистон миллий терма жамоасига рақиб бўлади. Ҳар иккала ўйин, худди «Бунёдкор»нинг ўйини сингари, Тошкентдаги «Ўзбекистон» спорт мажмуасида ўтказилади. Барча ўйинлар 12:00да бошланади.

Эроннинг Исфаҳон шаҳри шарафини ҳимоя қилувчи «Санае Гити Пасанд» футзал клуби 2010 йилда ташкил этилганига қарамай, қисқа фурсат ичида нафақат Эрон, балки Осиёнинг энг кучли жамоаларига қаторига қўшилди. Жамоа 2012/2013 йилги мавсумда Эрон чемпионлигини қўлга киритган бўлса, клублар ўртасидаги 2012 йилги Осиё чемпионати финалида Тошкентнинг «Ардус» жамоасини мағлуб этиб, қитъада тенгсиз бўлганди. Исфаҳонликлар 2013 йилги Осиё чемпионатида ҳам финалга қадар етиб боришди, бироқ ҳал қилувчи ўйинда Таиланднинг «Чонбури» жамоасига пенальтилар сериясида имкониятни бой берди.

Эътиборли томони, «Санае Гити Пасанд» таркибидаги аксарият ўйинчилар Эрон футзал терма жамоаси аъзолари ҳисобланишади. 2012 йили Таиландда бўлиб ўтган жаҳон чемпионатида Муҳаммад Кашоварз терма жамоа сардори сифатида майдонга чиққан, шунингдек, «Санае»дан Афшин Козимий, Ҳусайн Тойибий, Аҳмад Исмоилпур, Сепаҳр Муҳаммадий каби ўйинчилар чақирилган эди.

Ўзбекистон футзал термаси «Санае Гити Пасанд» билан ўйнайди