Косон туманиниг Каманди қишлоғида туғилган Бобир Абдухолиқовнинг миллионлар ўйинига ошно тутилиши Қаршининг “Насаф” клуби орқали бошланган.

Болаликдаги кумири афсонавий ҳужумчи Зафар Холмуродовнинг ўйинларига меҳр қўйишни бошлади ва мақсади сари дадил қадам ташлади. Футболга бўлган юқори қизиқиши сабаб у отасини “Насаф” академиясига боришни кўндиради. Академияда унга Умар Раҳматтулаев устозлик қилади. Қизиғи, “Пеле” лақабини ҳам айнан ушбу мураббий беради. 2014 йилда “аждарлар” ўринбосарлар жамоасига таклиф этилган Бобир тезда иқтидорини ва салоҳиятини намоён қилишга киришади.

Кичик жуссасига қарамасдан чайир ва епчил ҳаракатлари Рўзиқул Бердиевнинг диққатини ўзига жалб қилади. Кейинги йилларда асосий таркиб билан бирга машғулотлар ва йиғинларда қатнашиб тажрибасини ошириб боради. 2016 йилги мавсумга бош жамоа билан ҳозирлик кўрган футболчи ОЧЛ гуруҳ босқичи босқичи биринчи турида Саудия Арабистонида “Ал Аҳли”га қарши ўйинда асосий таркибда учрашувни бошлайди. Халқаро ўйиндаги дебютини гол билан безашга муваффақ бўлди ва Қаршидаги жавоб баҳсида ҳам тўп киритишни уддасидан чиқди.

Шу йили у Жасур Абдураимов бошчилигидаги Ўзбекистон ёшлар терма жамоаси билан Бахрайндаги Осиё чемпионатида қатнашади. Гарчи мундиалга чиптани қўлга кирита олмаган бўлсакда Бобир ўзининг ўйинлари билан кўпчиликка манзур келди. Ажойиб иқтидор соҳиби кейинчалик ОТЖ билан Хитойдаги Осиё чемпионатида чемпионликни нишонлади. Афсуски, қишда Таиландда ўтказилган қитъа чемпионатида у терма жамоа билан Олимпиадага чиқа олмади. Умид қиламизки футболчи миллий терма жамоамиз билан Қатардаги мундиалга йўлланмани қўлга киритади.

Сайтимиз ижодкорлари номидан Бобир Абдухолиқовга соғлик ва саломатлик, фаолиятида улкан зафарлар тилаб қоламиз!

Абдулазиз Искандаров тайёрлади

Ўзбекистонлик “Пеле” Бобир Абдухолиқовни табриклаймиз