Бу ўйиндан олдин ҳар иккала жамоа сафида уч нафардан футболчи жароҳат олгани маълум бўлди.

"Мураббийни биринчи навбатда жароҳатлар безовта қилади. Бу доим оғриқли савол бўлиб келган. Айни пайтда ўйиндан олдин Акром Комилов, Сардор Собирхўжаев ва Марко Симич жароҳатланди", - деди "Пахтакор" устози Шота Арвеладзе ўйиндан олдинги матбуот анжуманида.

Марко Симичнинг оёғига гипс қўйилган ва анча муддатга сафдан чиққан. Собирхўжаев ва Комилов эса бугун якка тартибда машғулот олиб боришди.

"Ярим ҳимоячилар Али Ҳусни, Каррар Набил ва дарвозабон Амжад Раҳим жароҳат олишган ва эртанги баҳсда бизга ёрдам бера олишмайди", - деди "Эйр Форс" бош мураббийи ўйинолди матбуот анжумани чоғида.

Маълумот учун, Али Ҳусни яқинда БААда ўтган Осиё Кубогида Ироқ миллий терма жамоаси сафида ўйнади. Амжад Раҳим эса жамоанинг учинчи дарвозабони ҳисобланади.

Эслатиб ўтамиз, "Пахтакор" - "Эйр Форс" учрашуви 12 февраль куни соат 15:00да "Пахтакор" стадионида бошланади.

"Пахтакор" - "Эйр Форс". Иккала жамоа сафида уч нафардан йўқотиш бор