Эктор Купер бошчилигидаги Ўзбекистон терма жамоаси кечадан бошлаб йиғинга киришгани ҳақида хабар бергандик. Кеча ёпиқ тарзда ўтказилган машғулотда иштирок этган Шерзод Аъзамов бугун терма жамоа лагерини тарк этди. Аъзамовнинг бел қисмидан олган жароҳати унинг машғулотларда иштирок этишига йўл қўймади.

Шунингдек, Купер жалб этган таркибдан ўрин олган "Локомотив"нинг ўнг қанот ҳимоячиси Шуҳрат Муҳаммадиев ҳам терма жамоа билан бирга эмас. "Бухоро"га қарши баҳсда жароҳат туфайли майдонни тарк этган футболчи айни пайтда муолажа ўтказиш билан банд. Шу боисдан ҳам унинг ўрнига терма жамоага "Қўқон-1912" ҳимоячиси Мурод Холмуҳаммедов чақирилди ва футболчи кечадан буён машғулотларда иштирок этмоқда. Биринчи машғулотни ўтказиб юборган "Пахтакор" аъзоси Акмал Шораҳмедов ҳам бугундан эътиборан терма жамоа билан шуғулланишни бошлади.

Шерзод Аъзамов ва Шуҳрат Муҳаммадиев Сурия ва Эрон терма жамоаларига қарши ўртоқлик учрашувларини ўтказиб юборишади.

МТЖдан чақирув олган легионерлар эса Сурия терма жамоасига қарши ўртоқлик ўйинига бир ҳафта қолганида ўз клублари ихтиёридан МТЖ лагерига келиб қўшилишади.

Шуни қайд этиб ўтиш керакки, жароҳатлари туфайли легионер мақомидаги икки ярим ҳимоячи Вагиз Галиулин ҳамда Фозил Мусаев Купер бошчилигидаги терма жамоамизнинг илк йиғинини ўтказиб юборишмоқда.

"Пахтакор" футболчиси МТЖ лагерини тарк этди