Кеча Хитой Суперлигаси "Вильярреал" ҳужумчиси Седрик Бакамбу Пекиннинг "Бейжинг Гоан" клубига ўтганини тасдиқлади. У 4 йиллик шартнома имзолади ва йилига 18 млн. евро ишлаб топадиган бўлди.

Агар сиз қишнинг энг айёр трансферини кузатмаган бўлсангиз, ҳозир бу ҳақида маълумот берамиз. Хориждан футболчи олмоқчи бўлган Хитой клуби трансфер учун 5,8 млн. евродан кўпроқ сарфласа (Бакамбуни 40 млн. еврога сотиб олишди), харид қилинган пул миқдорида давлатга солиқ тўлашга тўғри келади (бу вазиятда 34,2 млн. евро). Аммо пекинликлар солиқ тўламаслик режасини тузишди.

"Бейжинг Гоан" қоидаларга риоя қилиб, трансферни амалга оширишганида, Пекин клуби футболчи учун "Вильярреал"га 40 млн. евро, Хитой футбол федерациясига эса 34 млн. евро тўлаб бериши керак бўларди. Аммо "уддабуронлар" солиқ тўламаслик учун "сариқ сувости кемаси"га бошқа компания орқали пул ўтказиб беришди. Бакамбу эса "Бейжинг Гоан"га эркин агент сифатида ўтди. Аммо трансферни расман тасдиқлашмади. Бир неча кундан сўнг, Хитой регламентни ўзгартирди: "Вильярреал" бошқа компаниядан олган пул ҳам трансфер маблағи ҳисобланади. Қонунни четлаб ўтиш ва солиқ тўламаслик учун жарима - 10 очко.

Натижада "Бейжинг Гоан" бош менежери Ли Мин клуб солиқни тўлагани ҳақида маълум қилди. Демак, трансфер 74,2 млн. еврога тушди.

Хитой ҳукуматини алдашнинг иложи йўқ.

"Пекин" операцияси ёки Хитой клуби ҳукуматни алдамоқчи бўлди, аммо...