Аввалроқ ФИФА айнан ЖЧ-2018 ўйинларидаёқ VAR тизими ва Goal-line technology (тўп дарвоза чизиғини кесиб ўтган/ўтмаганини аниқловчи тизим)ни илк бор йирик мусобақада қўллаб кўришга қарор қилганди. Ва бу Франция - Австралия учрашувида ҳал қилувчи омиллардан бири бўлди.

1. Ҳакам пенальти белгилаш ниятида эмас эди, лекин видео-ёрдамчилар маслаҳати ва майдон четидаги монитор ёрдамида ўн бир метрлик жарима белгилаш керак деб ҳисоблади. Гризманн нуқтадан адашмади.

2. Поль Погбанинг зарбаси рикошет туфайли ажойиб траектория бўйлаб дарвозага йўл топди, аммо барибир тўп чизиқни кесиб ўтганлигини ишонч билан айтиб бўлмасди. Гол бўлдими? Аниқми? Бир неча сония сукут ва бош ҳакам майдон марказини кўрсатди. Унинг қўлидаги "соат" (махсус мослама) ишлаб кетди (Goal-line technology ўзини кўрсатди), демак – гол бўлган.

Ўйин динамикаси, атрофдаги шовқин ... Бундай вазиятда инсон хато қилиши, кўрмай қолиши ҳеч гап эмасди. Янги технологияларсиз Франция очко йўқотиши ва ютқазиб қўйиши ҳам мумкин эди. Жамоа тўп билан кўпроқ муомала қилди, ўйин тизгинини қўлида ушлаб тургандек эди, аммо кўпчилик кутган енгил ва ёрқин ўйин йўқ эди.

– Баъзан яккакурашларда мағлуб бўлдик ва тўп оширишларда хатога йўл қўйдик. Нима бўлганини ва нега бундай бўлганини тушунтириш мушкул, бироқ ўйин тизгини бизнинг қўлимизда эди, – деди Дидье Дешам.

Россия майдонларида ўтаётган ЖЧ дастлабки уч кунида 6 та пенальти белгиланди, ўтган мусобақада (бошидан охиригача) – 13 та. Ўтган ЖЧда – бир бор футболчи имкониятни голга айлантира олмаган, бу сафар – "уже" иккита. Мазкур Жаҳон Чемпионати трендларидан бири шубҳасиз, ўн бир метрлик зарбалар.

Пенальтилар чемпионати. Россияда рекорд томон одимлашмоқда