Гарчи марказий мақомда бўлмасада, мазкур учрашувга оид эътиборли фактларни келтириб ўтамиз.

Ўзаро ўйинлар

Гарчи сўнгги йилларда олмалиқликлар кўп бор ғалабага эришаётган бўлсада, бу борада устунлик "қалдирғочлар" томонида қолмоқда. Жамоалар Суперлига доирасида 30 маротаба тўқнаш келишган. 16та баҳсда "Бунёдкор", 7та учрашувда ОКМКнинг қўли баланд келган. Яна 7та баҳсда томонлар муроса кўчасини танлаган. Тўплар нисбати 46-31. Пойтахт клуби Суперлига доирасида меҳмон мақомида 7та ўйиндан бери мағлубиятга учраётгани йўқ. Жамоа сўнгги бор ўтган мавсумнинг 14-турида Жиззахда ютқазган эди.

Жиззахдан ғалаба билан

"Бунёдкор" мавсумни Жиззахда бошлади ва "Сўғдиёна"ни 1:0 ҳисобида мағлубиятга учратди. Статистикага эътибор берадиган бўлсак, "қалдирғочлар" сўнгги бор "Сўғдиёна" майдонида 2018 йил Миржалол Қосимов устозлигида ортга ғалаба билан қайтган эди. Кейинги 4та баҳсда мезбонлар 2 бор уч очкога эга чиққан бўлса, яна 2та беллашувда томонлар муроса кўчасини танлаганди. Қосимовдан сўнг Жиззахда ғалаба қозонган Мурод Отажонов бугун Қосимов бошчилигидаги ОКМКга қарши майдонга чиқади.

Абрамов сўнгги "қалдирғоч"

"Бунёдкор" ОКМК билан 7та ўйиндан бери майдонни 3 очкосиз тарк этмоқда. Сўнгги ғалаба 2019 йилда Вадим Абрамов бошчилигида қўлга киритилган. Вадим Карленович "кончилар"ни мағлуб этган "қалдирғочлар"нинг сўнгги мураббийи бўлиб қолмоқда. Хўш, Мурод Отажонов "Бунёдкор" устози сифатидаги илк уринишида Жиззахдаги "қора" анъанага барҳам берди. Эндиги навбат ОКМК билан ҳисоб-китобгами?

Эксперт фикри

"Бунёдкор" собиқ футболчиси Анвар Ғофуров бугунги ўйин олдидан жамоаларнинг имкониятини қуйидагича баҳолади.

— ОКМК яхши таркибга эга. Жамоадаги ҳар бир футболчи тажрибали ва ўйинни ҳал қилиши мумкин. Улар олдига юқори ўринларни эгаллашни мақсад қилган. "Бунёдкор" эса Жиззахда бошлаган ғалабали серияни давом эттиришга уриниб кўради.

Имкониятлар: 60/40

ПРЕВЬЮ. ОКМК - "Бунёдкор". Абрамов сўнгги "қалдирғоч" ёхуд Қосимовдан Қосимовгача