Ҳозирча "Бавария", "Барселона", "Реал" ҳамда "Боруссия Дортмунд" жамоалари чорак финал бекатида туришибди.
Бугун ва эртага қолган тўртта омадли ва кучли жамоаларнинг номлари маълум бўлади.

Португалияда "Порту" устидан ишончли ғалабага эришган "Ювентус" жавоб учрашувида катта муаммоларга дуч келмаслиги ҳақиқатга яқинроқ.
Испанияда "Лестер" гарчи мағлубиятга учраган бўлсада, уларда биргина кичик устунлик мавжуд. Яъни улар меҳмонда гол уришни уддасидан чиқишганди ва ўз уйларидаги баҳсда 1:0 ҳисобидаги ютуқ уларни тўла қаноатлантиради. Бу вазифани уддалаш эса шунчаки осон иш эмас. Чунки "Севилья"дек еврокубоклар тажрибаси катта бўлган жамоани енгиш ЕЧЛда илк маротаба меҳмон бўлиб турган камтар "Лестер"га оғирлик қилиши мумкин.

Туриндаги беллашувда "Порту" ҳужумкор ўйнашга мажбур. Улар чиқмаган жондан умид деганларидек, 90 дақиқа ичида тўқнашувдаги мувозанатни тиклашга ҳаракат қилиб кўришади. "Ювентус" эса ўз майдонида кўпдан буён мағлубиятга учрамаган ва туринликлар ўз мухлислари қаршисида янада тажовузкор футбол кўрсатишади. Аллегри жамоаси бугунги баҳсда ҳужумда кўпроқ бўш ҳудудларга эга бўлишади. Икер Касильясга эса етарлича иш топилиши аниқ. Аллегри бу галги ўйинда 4-2-3-1 тактик схемасидан фойдаланиши кутилмоқда. Ҳимоя марказида катта эҳтимол билан Бонуччи ҳамда Бенатия ҳаракатланади. Жоржио Кьеллини жароҳатидан фориғ бўлиб учрашув қайдномасига киритилган бўлсада, Аллегри бошланғич таркибда Бенатияни тушириши мумкин. Чунки "Юве" чорак финал масаласинининг асосий қисмини Португалиядаёқ ҳал этиб улгурган. Шу боисдан ҳам Аллегри етакчи ҳимоячи бўйича таваккалга қўл урмаслиги мумкин. Аллегри бугун таркибда бемалол ротацияни амалга ошира олади. Бунинг учун унда имконият ва танлов ҳам кенг. Жамоанинг охирги машғулотларидан келиб чиқиб айтадиган бўлсак, ҳимоянинг ўнг қанотидан Алвеш эмас, балки Лихтштайнер ўрин олиши эҳтимоли юқори. Шунингдек, Клаудио Маркизионинг ҳам бугун асосий таркибда тушиши аниқ.
"Ювентус" биринчи ўйинда ўзи учун идеал ҳисобни қайд этган. Бугун эса шунчаки футболдан завфланиб, ўз мухлисларига навбатдаги чиройли ғалабани тақдим этишга уриниб кўради.
"Порту" ниманинг эвазига муваффақият қозониши мумкин?
Нуно Эспиринто Санто жамоаси Туриндаги баҳсда "Ювентус"ни таслим этиши ва якуний ҳисоб улар қониқарли бўлиши учун, аввало жамоага катта омад зарур бўлади. "Порту" Туринда ғалабани қўлга киритиши учун жамоа нафақат мавсумдаги, балки ўз тарихидаги энг яхши ўйинни кўрсатиши лозим бўлади. Шунингдек, нафақат "Порту" кучли ўйнаши, "Ювентус" ҳам камида ўтган ҳафтадаги ПСЖ сингари жуда бўш ҳаракат қилиши керак бўлади. Шуни аниқ айтиш мумкин, "Ювентус" ПСЖ каби кучсиз характерга эга эмас. Туринликларда ғолиблик руҳи анча баланд. Тўғриси, ғалати ўхшатиш. "Ювентус" билан ПСЖни ўхшатишни ўзи кулгули. Лекин футболда ҳар нарса руй бериши мумкинлигига ўтган ҳафтада гувоҳи бўлдик.
Бу тўқнашувда имкониятлар "Ювентус" фойдасига. "Порту" агарда фантастикага қўл ура олса, бу катта шов-шувли сенсация бўлади.

Туринда бугун футбол мухлислари Жижи Буффон Икер Касильяс ўртасидаги навбатдаги қарама-қаршиликни томоша қилишлари мумкин. Футбол тарихидаги ушбу иккита афсонавий дарвозабонларнинг бу галги тўқнашуви ҳам кўпчиликда қизиқиш уйғотиши табиий.

"Лестер"дек оддий ва кичик клубни дунёга танитган, жамоа тарихида янги саҳифа очган Клаудио Раньерини "Севилья"дан учралган мағлубиятдан кейин истеъфога чиқарган англияликларга бугун биргина гол ҳам зафар келтириши мумкин. "Лестер" энди ЕЧЛдаги илк юришини Крейг Шекспир имзоси билан давом эттиришга, клуб тарихидаги яна бир саҳифани яратишга уриниб кўради. Бир қарашда "Лестер"ни олдида турган вазифа уддалаб бўлмас эмас. Аммо уларнинг қаршисидаги рақиб анойилардан эмаслигини унутмаслик лозим. Хорхе Сампаолининг тузаётган жамоасини хоҳ меҳмонда, хоҳ уйда бўлсин таслим этиш мушкул масала. "Лестер" чорак финалга чиқиши учун камида биринчи даврада "Манчестер Сити" билан ўйинда ҳаракат қилгани каби ўйнаши керак. Ўшанда футболчилар кўзидаги учқунли оловни ўчириб бўлмаганди. Ўша баҳсда барча ўтган йилги "Лестер"ни қайта кўргандек бўлганди. Бугун яна ўша "Лестер" қайтса, унда "Севилья" устунлик ҳамда чорак финал йўлланмасини рақибига топшириб қўйиши мумкин.

Ушбу тўқнашувда ҳали интрига мавжуд ва барча масала ҳакамнинг финал хуштаги янграмагунча ҳал этилмайди.
Бу баҳсда ҳали нимчорак финал ўйинларида кузатилмаган ҳолат, яъни экстра таймлар гувоҳига айлансак ҳам ажабмас.

Европа чемпионлар лигаси, 1/8 финал.

Жавоб ўйинлари.

"Ювентус" - "Порту" (00:45)

"Ювентус-стэдиум" стадиони.

Бош ҳакам: Овидиу Хатеган.

"Ювентус" (тахминий таркиб): Буффон; Лихтштайнер, Бенатия, Бонуччи, Алекс Сандро; Маркизио, Хедира; Куадрадо, Дибала, Манджукич; Игуаин.

"Порту" (тахминий таркиб): Касильяс; Макси Перейра, Маркано, Фелипе, Лаюн; Данилу, Андре Андре, Оливер Торрес; Брахими, Андре Силва, Соарес.

Биринчи учрашув: 2:0

"Лестер" - "Севилья" (00:45)

"Кинг-Повер стэдиум" стадиони.

Бош ҳакам: Даниеле Орсато.

"Лестер" (тахминий таркиб): Шмейхель; Симпсон, Морган, Хут, Фухс; Махрез, Дринкуотер, Ндиди, Олбрайтон; Оказаки, Варди.

"Севилья" (тахминий таркиб): Рико; Рами, Пареха, Меркадо; Мариано, Н'Зонзи, Насри, Эскудеро; Иборра; Йоветич, Витоло

Биринчи учрашув: 1:2

Превью: "Ювентус" - "Порту" ва "Лестер" - "Севилья"