Ушбу беллашувда қуйидаги расмий шахслар фаолият олиб боришади.

30 август, якшанба
17:00 ДИНАМО – ХОРАЗМ ("Футбол ТВ" LIVE)
Ҳакамлар: Акобирхўжа Шукуруллаев, Бектурсин Канназаров, Дамир Искандеров
Назоратчи: Андрей Снетков
Комиссар: Жаҳонгир Раҳматуллаев.

ЎзПФЛ ҳамда УзРепорт Про лига учрашувларини трансляция қилиш масаласида ўзаро келишувга эришганидан хабарингиз бор. 30 август санасидан бошлаб шу келишув асосида футбол учрашувлари тест режимида эфирга олиб чиқила бошланади.

Пандемия сабаб Про лига учрашувлари 3-турдан кейин танаффусга чиқишга мажбур бўлганди. Бугун — 30 август куни Самарқандда 3-турнинг қолдирилган битта учрашуви ташкил этилади. Унинг доирасида мезбон “Динамо” футболчилари “Хоразм” клубини қабул қилади.

17:00 га тайин қилинган учрашувни ёритиш учун Футбол-ТВ ходимларидан иборат гуруҳ йўлга чиққан. Асосан еврофутбол учрашувларини халқимизга намойиш этиб келаётган телеканал, секин-асталик билан ички чемпионатга ҳам эътибор қаратмоқда. Бу йўлда телеканал яқиндагина янги кўчма телевизион станция харид қилганди. Футбол бўйича унинг илк сафари Самарқандга бўлади.

Футбол-ТВ стадионлардан илк марта эфирга чиқаётганидан келиб чиқиб, иш тест режимида олиб борилади. Бунда мавжуд камчилик ва бошқа техник масалалар ўрганиб борилади. Бу синовлар муваффақиятли ўтса, кейинги учрашувларни қай тариқа эфирга олиб чиқиш масаласида якдил тасаввур пайдо бўлади.

Умид қиламизки, футбол мухлисларимиз бошланажак ишни кузатиб боришади ва ундаги айрим масалаларга бағрикенглик билан муносабатда бўлишади. Ҳозирги шароитда Про лига учрашувларининг ҳам секин-асталик билан мунтазам жонли эфирларга эга бўлиши бизнингча катта ютуқдир.

Про лига. Бугун "Динамо" - "Хоразм" учрашуви жонли намойиш этилади