ПСЖ клубининг бир неча юз нафар мухлиси клуб офиси ёнида норозилик намойишини ўтказишмоқда. Норозилик акциясини ўтказишдан мақсад клубни тизимли ва ақл билан бошқаришга ўтишдир.

Норози мухлислар клуб президенти Носир Ал-Ҳелайфининг истеъфосини талаб қилишмоқда. Шу билан бирга, мухлислар Неймар, Месси ва Верраттиларни жамоадан кетишини исташмоқда.

Collectif Ultras Paris, яъни клубнинг содиқ мухлислар жамоаси раҳбари қуйидаги сўзларни келтирган:

"Бу кемада капитан йўқ. Биз клуб президентидан муҳимроқ ишлар билан шуғулланишини ва истаган пайтимиз биз билан учрашишини хоҳлаймиз.

Бу футболчилар бизни йил давомида шарманда қилиб келишмоқда", -дейди Collectif Ultras Paris етакчиси Ромен Мабиль.

Ушбу намойишга келган юзлаб мухлислар "Месси енгилтак аёлнинг боласи", - дея бақираётгани акс этган видео ҳам ҳозирда ижтимоий тармоқларда айланиб юрибди.

Эслатиб ўтамиз, Лео Мессининг Саудия Арабистонига қилган ташрифи ортидан клуб уни ўйин ва машғулотлардан четлаштирганди. Бугун эса Месси аллақачон клубдан кетишга қарор қилгани ҳақида хабарлар тарқалди.

ПСЖ мухлислари клуб қароргоҳи ёнида Мессини ҳақоратлаб, намойиш ўтказишмоқда