Мазкур тур давомида мухлислар бир қатор қизиқарли учрашувлар гувоҳига айланишди. Биз эса ўтган ўйинларга оид қизиқарли маълумотларни эътиборингизга ҳавола қиламиз.

- "Металлург"нинг Суперлигадаги ғалабасиз серияси 11 та ўйинга етди. Жамоа сўнгги маротаба 2023 йилги мавсумнинг сўнгги турида "Олимпик"ни таслим қилганди.

- "Сурхон" Суперлигада сўнгги 4 та ўйинда рақибларига ютқазгани йўқ, 2 дуранг, 2 ғалаба.

- Бекободликлар 3 та ўйиндан бери "Сурхон"ни ютишни уддалай олмаяпти. Улар охирги марта 2022 йилги мавсумда рақибидан 3 очко тортиб олган.

- Шаҳзод Убайдуллаев Суперлигадаги 95-учрашувида майдонга тушди ва 27 та гол урди.

- Жаҳонгир Абдусаломов фаолиятида илк бор битта ўйинда 2 та гол урди.

- Қизиқ факт. "Металлург" 2024 йилдаги барча мағлубиятларни фақат меҳмонда қабул қилиб олмоқда. Мезбон мақомида эса ҳали ютқазгани йўқ ва 4 бор дуранг қайд этди.

- "Навбаҳор" Суперлигада сўнгги 3 та ўйинда рақиблар дарвозасига йўл топа олмади.

- "Лочинлар"нинг чемпионат баҳсларидаги ғалабасиз серияси 4 та ўйинга етди.

- "Қизилқум" 3 йилдан сўнг Наманганда "Навбаҳор"дан очко олди. Навоийликлар бу ишни 2021 йилги мавсумда уддалаганди.

- Жамшид Саидов жамоаси Суперлигада 10 та ўйиндан бери ўйинларни 3 очкосиз тугатмоқда. Жамоа охирги бор жорий йилнинг 11 март куни "Сурхон" устидан зафар қучганди.

- "Навбаҳор" бу йил ютқазмаган ягона жамоа бўлиб турибди. Наманганликлар Суперлигада охирги маротаба 2023 йилнинг ноябрь ойида "Олимпик"ка енгилганди.

- "Насаф" ўз майдонида ҳали таслим бўлмаган Суперлиганинг иккинчи жамоаси сифатида кетмоқда.

- "Нефтчи" меҳмондаги сўнгги 4 та ўйиннинг фақат 1 тасида ютуқни қўлга киритди.

- "Нефтчи" кетма-кет иккинчи мавсумда Қаршида гол ура олмади. Бу ишни бажарган сўнгги "Нефтчи" футболчиси Иззатилла Абдуллаев ҳисобланади.

- Жорий йилда илк бор "Нефтчи" ва "Насаф" иштирокидаги учрашувларда автогол қайд этилди.

- Миржалол Қосимов ОКМК бошқарувига келганидан буён илк бор "Пахтакор"ни таслим қилди. Мураббий мазкур вазифани сўнгги бор 2018 йил "Бунёдкор" билан бажарганди.

- ОКМК чемпионат доирасида эса 7 йилдан сўнг "шерлар"ни мағлуб этди. Бу ишни улар сўнгги маротаба 2017 йилги мавсумнинг биринчи даврасида уддасидан чиққанди.

- Олмалиқликлар уйда очко жамғариш бўйича жадвалда биринчи ўринга чиқиб олди, 16 очко.

- "Пахтакор" элитада 3 йилдан кейин битта ўйинда 4 та гол ўтказди. Пойтахт клубига сўнгги маротаба 2021 йилги мавсумнинг 21-турида "Қўқон-1912" 4 та гол уришни уддасидан чиққан эди.

- "Бунёдкор"нинг "Олимпик" билан ўйинлардаги ёқимсиз анъанаси давом этди. Бу икки жамоа ўртасидаги бешинчи ўйин сифатида тарихга кирди. Мазкур беллашувларнинг 4 тасида дуранг, 1 тасида эса Тимур Кападзе шогирдларининг қўли баланд келган. "Бунёдкор" эса учинчи мавсумдирки "Олимпик"ни мағлубиятга учрата олаётгани йўқ.

- Бош ҳакам мезбонларнинг икки футболчиси Миржаҳон Мираҳмадов ва Фране Чирякка қизил карточка кўрсатди. "Қалдирғочлар" учрашувни 9 киши бўлиб тугатишга мажбур бўлди. "Бунёдкор" футболчилари Ўзбекистон чемпионатлари тарихида биринчи марта битта ўйинда иккита қизил карточка олди.

- Темурхўжа Абдухолиқов профессионал фаолиятидаги 418-учрашувида майдонга тушди ва 165-голини урди.

- "Қалдирғочлар" кетма-кет тўртинчи ўйинда майдонни ғалабасиз тарк этди.

- "Бунёдкор" Суперлигада фейр-плей бўйича энг ёмон жамоа бўлиб турибди. Жамоа футболчилари 11 та ўйинда 5 маротаба қизил карточка билан жазоланди.

- "Темирйўлчилар"нинг Суперлигадаги ғалабасиз серияси 9 та ўйинга етди. Жамоа 14 март кунидан буён 3 очко нималигини билмаяпти.

- "Локомотив" сўнгги 3 та ўйинда "Сўғдиёна"ни юта олгани йўқ. Жамоа охирги бор 2021 йилги мавсумда ўз майдонида рақибидан устун келган.

- "Динамо" стадиони 588 кундан сўнг яна Суперлига учрашувига мезбонлик қилди. Сўнгги ўйин 2022 йил 26 ноябрь куни бўлиб ўтган.

- "Андижон" бу мавсум меҳмонда энг кўп очко (11) жамғарган жамоа бўлиб турибди

- Самарқандликлар ўз майдонида 5 йилдан бери "бургутлар"ни юта олмаяпти (охирги ғалаба 2019 йил, 2:1).

Қосимов барча анъаналарга чек қўйди. "Андижон" чемпион. Пойтахт клублари осмонида эса қора булут — Суперлиганинг 12-тури ҳақида