Жамоа етакчи ўйинчиларидан бири Қувондиқ Рўзиев бугун Спорт телеканалига берган интервьюсида ўйин борасидаги фикрларини билдириб ўтди.

“Бу учрашув мураббийлар жанги бўлди десам, адашмаган бўламан. Улуғбек Бақоев ва Бахтиёр Ашурматов ўз вақтида битта жамоада ишлашган. Мураббийларимизнинг юзини ёруғ қилиш учун ҳам алоҳида меҳнат қилдик. Шунингдек, ёрдамчи мураббий Даврон Файзиев ҳам Жиззахда фаолият юритганлар. Мухлисларни ишончини қозониш учун ҳам яхши тайёргарлик кўрдик. Кўплаб мухлислар олидида ютқазиб қўйсак ҳам бўлмасди. Бор кучимизни ишга солиб ғалаба қозондик. Иккинчи гол машғулотларда ишланганди, унинг самарасини кўрдик десак ҳам бўлади. Мурод Ҳолимуҳаммедов стандартларга мослашган футболчи. Жарима, бурчак, пенальти зарбаларида адашмайди. Бундан унумли фойдаланяпмиз. Филип Раевац олдин ҳам жамоамизда ўйнаб кетган. Қўқондаги фаолияти орқали ўзбекистонлик мухлисларга танилган. Шу сабабли чиқишиб кетишда муаммо бўлмади. Ҳудди ўз уйидек ҳис қилмоқда. Қоида бузишнинг фарқи бор. Шавкат Муллажонов бироз пастроқ зарба берганида жароҳат жиддий бўлиши мумкин эди. Шуни таъкидлаб ўтмоқчиманки, ҳаммамиз футболчилармиз. Топадиган нонимиз майдон ичида. Бир-биримизни ҳурмат қилсак мақсадга мувофиқ бўлади”, - дейди Рўзиев.

Қувондиқ Рўзиев: “Суғдиёна“ билан ўйин ўзаро мураббийлар жанги бўлди”