Кеча ҳам сайтимизнинг фикр қолдириш бўлимида деярли ҳар бир хабар тагига мухлислар роса ёзишди: "6 февраль куни Ўзбекистон миллий терма жамоасининг янги бош мураббийи эълон қилиниши керак эди. Қани мураббий? Ким бошқаради? Берилган ваъда нима бўлди?"

Тўғри, кеча ЎФА биринчи вице-президенти Умид Аҳмаджонов чет давлатга учиб кетди. Лекин ҳеч қанақа Дубай ёки Эронга эмас, балки Миллий олимпия қўмитаси раҳбари сифатида Жанубий Кореянинг Пхенчёнг шаҳрига йўл олди. Чунки у ерда навбатдаги қишки Олимпиада ўйинлари бўлиб ўтади.

Қизиғи, Умид Аҳмаджонов "Футбол Экспресс" газетасига берган интервьюсида 6 февраль куни кечки пайт БААга жўнаб кетаман, янги мураббий билан 7 ёки 8 февралда кўришишимиз керак деб айтиб ўтганди. Аммо энди режалар ўзгариб қолди ва Аҳмаджонов Кореяга йўл олди. Бундан кўриниб турибдики, бош мураббий масаласи яна ортга сурилган.

Бугун эса бошқа бир хабар тарқалди. Эмишки U-23 Осиё чемпионати чемпиони Равшан Ҳайдаров миллий терма жамоанинг вақтинча бош мураббийи этиб тайинланибди. Бу ҳақда ўқувчиларимиз тинмай "коммент" қолдирмоқда ва биздан аниғини билиб беришни сўрашяпти. Натижада бу гап қанчалик ҳақиқатга яқин эканлигини билиш мақсадида Равшан Ҳайдаров билан боғландик.

Салом-аликдан сўнг Равшан Акмалович миллий терма жамоани бошқариш борасида умуман таклиф тушмаганини айтиб ўтди:

- "Терма жамоани бошқариш? Менга бу ҳақда ҳали ҳеч ким гапиргани йўқ. Буни энди сиздан эшитиб турибман. Ҳозир бор эътиборим U-23 терма жамоамизни Осиё ўйинларига тайёрлашга қаратилган. Шу боис бошқа нарсани умуман ўйлаётганим йўқ. Биласиз, 21 ва 25 март кунлари водийда Саудия Арабистонига қарши иккита ўртоқлик учрашуви ўтказамиз. Мен қўл остимдаги жамоани шу ўйинларга тайёрлайман".

Равшан Ҳайдаров: "Миллий терма жамоа? Менинг бор эътиборим U-23 жамоасига қаратилган"