Мадриднинг "Реал" клуби ўз уйида Туриннинг "Ювентус" клубини қабул қилади. Ушбу баҳс олдидан таниқли спорт шарҳловчилари Даврон Файзиев ва Элдор Мустафоев қуйидаги саволларимизга жавоб берди.

"Реал" Туринда бўлиб ўтган ЕЧЛ 1/4 финал дастлабки учрашувида кейинги босқич масаласини деярли ҳал қилди. Бугун ҳужумкор ўйин кўришимиз мумкинми, ёки бўлмасам ПСЖ билан жавоб учрашувида гувоҳи бўлганиздек сценарий такрорланиши мумкинми?

Бугун "Ювентус"га Пауло Дибала, Андреа Барцальи ёрдам бера олмайди. Бу жамоа учун ҳам жиддий йўқотиш. Шундай бўлсада, "Ювентус" ниманинг эвазига камбэкни амалга ошириши мумкин, деб ўйлайсиз?

"Реал" Ла лигадан деярли умидини узиб бўлди. Бор эътиборини ЕЧЛга қаратган. "Реал" ҳар йили ҳеч бўлмаса 1та совринни қўлга киритишга одатланган. Мадридликларда фақат ЕЧЛ мусобақасида ғолиб бўлиш имконияти қолган. Бу йил ҳам "Реал" ЕЧЛни қўлга киритиши қанчалик ҳақиқатга яқин?

Даврон Файзиев (шарҳловчи)

"Реал" Туринда ғалаба билан уйга қайтди. Кеча бўлиб ўтган "Рома" ва "Барселона" жамоалари ўртасида бўлиб ўтган учрашувдан кейин, бу ўйинга бўлган муносабат бутунлай ўзгариб кетди. Мухлисларда ҳам иккала жамоада ҳам. "Рома"нинг қаҳрамонлиги "Ювентус"га далда бўлади. "Ювентус"нинг таркибидан келиб чиқадиган бўлсак, бугунги кунда "кекса синьора" "Рома"дан кўп жиҳатларда кучли ҳисобланади. Бу нарса "Ювентус"га таъсир қилади. "Рома" уддаладими, демак биз ҳам уддалаймиз деган кайфият бўлади. Бу нарса "Реал"га ҳам таъсир қилади. Натижа учун ўйнаш каби кайфият бўлмайди. Чунки, ўзининг асосий рақобатчилари қандай муаммо дуч келганини кўрди. "Реал" кечаги воқеалардан кейин бехавотир ўйнамаслиги аниқ. Бугунги ўйин қай даражада қизиқарли ўтишини кечаги баҳс қайсидир маънода таъминлаб берди.

Пауло Дибаланинг йўқлиги "Ювентус"га сезилиши мумкин. Сабаби, Дибала "Ювентус"да етакчи футболчилардан бири ҳисобланади. Аммо, Барцальининг йўқлигини "Ювентус" ёпа олади. Чунки, Барцальи ўзининг энг чўққисидан пастга қараб кетган. Ёш жихатидан ҳам ўйин савиясидан ҳам олдинги Барцальидан даражаси бироз пасайган. Бу йўқотиш ҳал қилувчи аҳамиятга эга эмас. "Рома" "Барселона"ни таркиб эвазига мағлуб этмади. Фақатгина битта учрашувда шижоат билан майдонга тушиб, шижоат билан ўйин кўрсатди. Жамоавий ўйин, руҳият, кайфият эвазига ғалаба қозонди. "Ювентус"да Дибала бўлган тақдирда ҳам, "Реал"га бас кела олмайди. Дибаланинг бор йўқлиги ҳал қилувчи аҳамиятга эга эмас.

Сўнгги воқеалар шуни кўрсатяптики, олдиндан бир нима дейиш қийин. Куч жиҳатдан "Реал" ўтган йилгидан пасайган, дея олмайман. "Реал" ўтган йилгидек кучга эга. Шунчаки ўтган йилги мотевация йўқлиги сабабли лигани бой берди, кубок баҳсларидан чиқиб кетди. ЕЧЛда эса ўша ҳамжиҳатлик чиқиб келмоқда. ПСЖга қарши ўйинда биз "Реал"нинг ҳақиқий кучини кўрдик. Бугунги кундаги "Реал Мадрид"нинг кучи ЕЧЛда ғолиб бўлишга етади. "Ювентус" тўсиғидан ўтиб ярим финал ёки финал баҳсларида майда деталлар "Реал"га ёки ёрдам бериши мумкин ёки бўлмасам тўсқинлик қилиши мумкин. Чорай финалнинг қолган иштирокчилари ёки ярим финал йўлланмасини қўлга киритган жамоалар орасида "Реал" кучли бўлса кучлики улардан кучсиз эмас. Балки булар орасида фаворитга айланиб қолгандир бугунги кунда", - дейди Даврон Файзиев

Элдор Мустафоев (шарҳловчи)

Бугунги кунда сенсация сўзини бирор жабҳада ишлатиш ноўрин бўлиб қолди. Кечаги ўйин бунинг яққол мисоли. Айрим жамоаларда мана шундай ҳолатлар тез тез кўрина бошлади, яъни технологик жиҳатдан биз рақибдан устунмиз деган қараш йўқ эмас. "Рома" учрашувга жуда яхши тайёргарлик кўрганини ва буни амалда исботлай олгани бугунги замонавий футболда ҳамма нарса бўлиши мумкинлигини исботлай олди. Италия жамоалари ҳар доим ўз ўрнига эга бўлиб келган. Балки сенсацияни "Ювентус"дан ҳам кутиш мумкиндир. "Барселона"нинг Европа чемпионлар лигасидан чиқиб кетиши "Реал"га қўшимча мотивация бериши турган гап. Хоҳлайсизми йўқми, "Реал" барибир ўзининг энг ашаддий рақиби сифатида "Барселона"ни билади, ЕЧЛда ҳам ЛаЛигада ҳам. Зиданнинг қарашлари шу жиҳатни ҳисобга олмасликка қаратилган бўлса ҳам эҳтимолдан ҳоли эмас. Зиданни танимасамда, уни кибрга бериладиган инсонлар тоифасига киритмайман.

"Реал"ни Испания кубогидан чиқиб кетганлиги - факт. Бироқ ўша айтганимдек "Барселона"нинг ЕЧЛдан чиқиб кетганлиги "Реал"га иштиёқ беради. Қолган совринларга эга чиқа олмаслиги сабабли "Реал" ушбу турнирга катта эътибор қаратади. Ундан ҳам қолишмайдиган жиҳат - рекордни ўрнатишдир. Яъни, ЕЧЛ бош совринини кетма кет уч марта қўлга киритишни жамоадагилар астойдил хоҳлашмоқда. "Ювентус" ўзига ҳос жамоа. "Рома"ни ҳам кўрдик, балки улар фақатгина бир ўйинда шундай ўйнай олар. Чунки "А" Серияда уларнинг ишлари унчалик яхши эмас. "Бавария" - "Реал"нинг асосий рақиби сифатида қолмоқда. Ўйиндан кейин қандай ўзгаришлар бўлишини ҳеч ким билмайди. Зидан шогирдлари ярим финалга чиқиш учун бўлаётган шундай имкониятдан 100 фоиз фойдалана олиши ҳақиқатга яқин турибди", - дейди Элдор Мустафоев

Жаҳонгир Сотволдиев ёзиб олди

ЕЧЛ. "Реал" - "Ювентус" ўйини олдидан Даврон Файзиев ва Элдор Мустафоев қандай фикрда?