Сайтимиз мухбири мазкур маросим якунида жамоа тўпурари Риза Айвазовнинг фикрлари билан қизиқди.

- Риза, аввало қўлга киритилган ютуқлар билан табриклаймиз. Ортда қолган мавсумдан қандай таасуротлар олдингиз?

- Ортда қолган мавсум кўтаринки руҳда ташкил этилди. Чемпионатда жиддий кураш кечди, ўйинлар соғлом рақобат муҳитида ташкилланди. Чемпионликни қўлга киритдик, албатта ушбу натижада жамоамизнинг ҳар бир аъзосини алоҳида ҳиссаси бор.

- Клубда футбол учун яратилган шароитлар қандай?

- Шароитлар аъло даражада. Фарғона давлат университети ректори клуб президенти ҳам ҳисобланади. Бизга клубимиз раҳбари томонидан барча шароитлар мукаммал яратиб берилмоқда. Раҳбариятга, мураббийлар штабига ва шу жамоада меҳнат қилаётган барчага миннатдорчилик билдирамиз.

- Сизнингча, 2-лига мусобақалари қандай даражада ташкил этилди?

- Вилоят футбол ассоциацияси мутасаддилари жорий мавсумда ҳам 2-лига ўйинларини профессионал тарзда ташкил этишди. Футбол ассоциация биринчи вице-президенти Носир Отақўзиев ва бошқа мутасаддилар вилоятда футбол ривожига ўзларининг муносиб ҳиссаларини қўшиб келмоқдалар. Чемпионат ташкил этиш осон иш эмас.

- Чемпионлик йўлида рақобат туғдирган қайси жамоаларни кўрсатган бўлардингиз?

- Чемпионатда иштирок этган барча жамоалар бирдек кучли эди. Рақобат ва совринли ўринлар учун кураш жуда жиддий кечди. Биз балки қаердадир кучли бўлдик, бир қадам кўпроқ қўйдик, шуларнинг натижасида чемпионликка эришдик.

Бекзод Толибов ёзиб олди

Риза Айвазов: "Иккинчи лигадаги рақобат жиддий кечди"