24 ёшли бразилиялик футболчи бу мавсумда Ла Лига ва Чемпионлар лигасида 13 та ўйин ўтказган (уларнинг 3 тасини асосий таркибда бошлаган) ва фақат 1 та голли пас берган. У жами 359 дақиқа майдонда бўлган — бу 4 та тўлиқ ўйинга тенг ёки ўртача ҳар ўйинда 27 дақиқадан.

ESPN Brasil хабар беришича, Родриго ҳозир ёзга нисбатан кўпроқ норози бўлиб қолган. У январ ойидаги қишки трансфер ойнасида “Реал”ни тарк этиши мумкин.

Ҳозирча Хаби Алонсо қўл остида унинг ҳолати ўзгаришига ишора йўқ. Шу сабабли ҳам футболчи, ҳам клуб, гарчи буни оммавий равишда билдирмаётган бўлсалар-да, келаси трансфер ойнасидаги эҳтимолий таклифларни кўриб чиқишга тайёр.

Айтилишича, Родриго агар кетадиган бўлса, Англия Премер-лигаси клубига ўтишни афзал билади. Ҳозирча расмий таклиф йўқ, аммо агар трансфер ойнаси очилишигача унга қизиқиш пайдо бўлса, ҳам ўзи, ҳам клуб, ҳам мураббийлар штаби бу таклифни кўриб чиқади.

Август ойида “Реал” Родригонинг нархини 80–100 миллион евро орасида баҳолаган эди. Шунингдек, “Арсенал” ва “Бавария” томонидан бразилияликка қизиқиш бўлгани хабар қилинган.

Родриго “Реал”даги ролидан тобора норози бўлмоқда ва январда клубни тарк этиши мумкин