Мазкур турда бир қатор кутилган ва кутилмаган натижалар қайд этилди.

Турнинг марказий баҳсида "Ростов" "Спартак" билан тўқнаш келди. Муросасиз ўтган ўйинда жамоалар иккитадан тўп киритишди ва якунда дуранг натижаси қайд этилди.

Мазкур баҳсда Ўзбекистон терма жамоаси ҳужумчиси Элдор Шомуродов тўлиқ ўйнади. Шомуродов фаол ҳаракат қилди, гол уриш учун, жамоадошларига голли вазиятлар яратишда жонбозлик кўрсатди. Бироқ якуний нуқтага келганда омад келмади.

Натижада "Ростов" ва "Спартак" ўзаро баҳсда мавсумдаги дастлабки дурангга имзо чекишди ҳамда илк бор очко йўқотишди.

"Уфа" ҳамда "Краснодар" ўртасида беллашув драматик тарзда ўтди. Майдон эгаларининг тезкор иккита голига "Краснодар" вакили Юнус Намли танаффусга қадар битта гол билан жавоб берди. Иккинчи таймда эса "Краснодар" характер кўрсатди ва якунда иродали ғалабани тантана қилди.

Яна бир кутилмаган натижа қайд этилган беллашув Самарада бўлди. "Крилья Советов" меҳмонига айланган "Арсенал" сафарда муҳим ғалабани расмийлаштирди. Жами 5та гол киритилган баҳсда Игорь Черевченко жамоаси ғолибга айланди. Шу тариқа Туланинг "Арсенал" жамоаси мағлубиятсиз серияни давом эттирган бўлса, "Крилья Советов" дастлабки мағлубиятга учради.

Биринчи турда "Крилья Советов"дан мағлуб бўлган ЦСКА эса ўз уйида кечган баҳсда "Оренбург" тўсиғидан муваффақиятли ўтди. Мазкур ўйинда ҳамюртимиз Вадим Афонин захирадан майдонга тушди ва 15 дақиқа ҳаракат қилди. Бироқ унинг майдонга тушиши "Оренбург"ни мағлубиятдан қутқариб қолмади.

Айни пайтда турнир жадвали пешқадами бўлиб турган камтарин "Урал" мазкур турда "Ахмат"га ҳеч қандай имконият қолдирмади. Дмитро Парфёнов бошқарувидаги "Урал" рақиб дарвозасига жавобсиз учта гол йўллади ва бу ғалаба орқали пешқадамликни мустаҳкамлади.

Дебютант "Тамбовь" эса биринчи турда амалдаги чемпион уйига сафар қилгач энди пойтахтга, яъни Кубок ва Суперкубок эгаси бўлмиш "Локо" билан куч синашди. Александр Григорян жамоаси гарчи дастлаб ҳисобни очган бўлсада, баҳс якунига қадар "Локо" вазиятни ўзи томон юмшатишга эришди.

Виталий Денисов ўтган Қозоннинг "Рубин" жамоаси "Локо"дан кейин бошқа бир Москва клуби "Динамо" майдонида меҳмон бўлди. Қайд этиш керакки, Денисов кутилганидек баҳсни бошланғич таркибда бошлади. Тенг курашлар остида ўтган беллашувнинг биринчи бўлимида "Рубин" майдонда бир киши кам бўлиб қолди. Бироқ шунга қарамасдан якунда қозонликлар охирги дақиқаларда гол уриб, муҳим 3 очко билан ортга қайтишни уддалашди.

Амалдаги чемпион "Зенит" "Сочи" меҳмони бўлган учрашув орқали Россия премьер лигасининг 2-турига якун ясалди. Мазкур баҳсда Семак жамоаси ортиқча қийинчилик Азмун ва Оздоевларнинг голи эвазига ғалабани тантана қилди.

Шу тариқа Россия премьер лигасининг иккинчи туридан кейин йўқотишларсиз кетаётган "Урал" ва "Зенит" пешқадамликни бўлишиб туришибди.

Дебютант "Сочи" ва "Тамбовь"да эса ҳозирча очко йўқ. Бу борада уларга "Оренбург" ва "Уфа" шериклик қилмоқда.

Россия чемпионатида иштирок этаётган ҳамюртларимиз: Элдор Шомуродов, Вадим Афонин ва Виталий Денисов мазкур турда ҳам ўйинга тушишди. Фақатгина Афонин баҳсга захирадан қўшилди. Шомуродов ва Денисов эса учрашувни бошланғич таркибда бошлаб, баҳсни тўлиқ ўтказишди.

Эслатиб ўтамиз, Элдор Шомуродов ҳисобида битта гол мавжуд. "Ростов"нинг ўзбекистонлик ҳужумчиси биринчи турда "Оренбург" дарвозасига боши билан гол уриб, жамоаси ғалабасига ўз ҳиссасини қўшганди.

Келаси турда Шомуродов ўйнаётган "Ростов" Туланинг "Арсенал" меҳмони бўлса, Афонин тўп тепаётган "Оренбург" амалдаги чемпион "Зенит"ни қабул қилади. Денисов ўтган "Рубин" эса бу турда ўз уйида "Ахмат" билан беллашади.

Россия премьер лигасининг тўпурарлар рўйхатида ҳозирча "Крилья Советов" футболчиси Александр Соболев 3та гол билан пешқадамлик қилмоқда. Соболев биринчи турда дубль қайд этиб, иккинчи турда битта гол урди.

Ассистентлар рўйхатида эса "Спартак"нинг бразилиялик ярим ҳимоячиси Фернандо иккита голли узатма билан пешқадамлик қилмоқда.

Россия чемпионати. 2-тур шарҳи