- Спарринг-рақиб Ўзбекистоннинг ўйинига қандай баҳо берасиз?

- Яхши рақиб. Бизни бу ерда илиқ кутиб олишди. Озроқ мослашиш керак бўлди, чунки Минскда синтетик қоплама майдонда ҳаракат қилганимиз учун бу ердаги майсага ўрганиш лозим эди. Яна бир муаммо, об-ҳаво билан боғлиқ бўлди, сабаби бу ерда иссиқ бошланган. Минскда +4°, +5° эди ва ҳатто қор ҳам ёғиб юборган.

Бугун захирада 3 нафар футболчимиз бор эди, иккинчи жамоамиз Минскда Беларусь билан ўйнамоқда. Йигитларга тасанно, борларини кўрсата олишмаган бўлса-да, натижа ёмон бўлмади.

- Ўзбекистоннинг ўйинини қандай баҳолайсиз?

- U-20 Осиё Кубогидаги айрим ўйинларини кўргандик. Улар катта иш қилишди. Олдинги чизиқда тезкор футболчилар ҳаракат қилиши, ҳимояда 5 нафар ҳимоячи ўйнашидан хабаримиз бор эди. Ўзбекистонлик айрим футболчиларни ёрқин келажак кутмоқда.

- Кимнидир ажратиб кўрсата оласизми?

- Захирадан тушган Асад Жўрабоев ва 14-рақамли Аббос Файзуллаевнинг ўйинлари манзур келди – тезкор ва техникаси юқори. "Рубин"да ўйнаётган Умарали Раҳмоналиев ҳам чиройли ўйин намойиш этяпти.

- Россия МТЖ устози Валерий Карпин Ўзбекистон терма жамоасини Европадаги Словения ва Словакия даражасида эканлиги таъкидлади. Сиз Ўзбекистон ёшларини U-20 даражасидаги қайси термалар билан солиштира оласиз?

- Биз кўп жамоаларга қарши ўйнаганмиз. Турли йилларда ҳар хил жамоа ва футболчилар пайдо бўлмоқда. Кейинчалик янги даражага кўтарилишмоқда. Биз кўп ҳам халқаро ўртоқлик ўйинларида қатнаша олганимиз йўқ. Охирги марта бир йил олдин йиғилгандик. Санкт-Петербургда йиғилганимизда, турли клублар билан баҳс олиб боргандик. Терма билан 2017 йилда ўйнаганмиз. Шунинг учун ҳозир жавобингизга жаво беришим қийин. Кўплаб жамоалар сиз сингари 5-2-3 схемасида ҳаракат қилаётганини айтиб ўтишим мумкин холос.

Россия U-20 устози Иван Шабаров: "Ўзбекистонлик айрим футболчиларни ёрқин келажак кутмоқда"