Кеча Қозоғистоннинг Актобе шаҳрига етиб келдик ва бир кеча ушбу шаҳарда тунаб қолдик. Барча ўзбекистонлик футбол мухлислари яхши билишади, ҳамюртимиз Александр Гейнрих Актобе шаҳрининг “Актобе” жамоасида фаолият олиб борган. Гейнрих футболчилик фаолиятинии якунлаганидан сўнг ушбу жамоада спорт директори лавозимида иш бошлади. Биз ушбу футболчи билан боғланишга эришдик. Афсуски, Ўзбекистон миллий терма жамоасининг собиқ футболчиси билан уюштирилиши режалаштирилган интервью айрим бир сабабларга кўра амалга ошмай қолди.

Начора ўзбекистонлик футболчи билан сафаримиз якунида интервью уюштиришга яна бир бор уриниб кўрамиз. Биз бу билан чекланиб қолмадик, аксинча, “Актобе” жамоасининг уй учрашувлари ўтказиладиган стадионга бориб у ерни кўздан кечиришга муваффақ бўлдик. Актобе шаҳрига қилган сафаримиз қисқа бўлгани сабабли бу ер ҳақида тўлиқ маълумотга эга бўлмадик. Бу ернинг айрим инсонлари билан суҳбатлашганимизда улар бизнинг миллий таомларимиз, тарихий шаҳарларимиз ва бобокалонларимизни тилга олиб ўтишди. Қайсидир маънода ушбу шаҳар менда илиқ таассурот қолдирди.

Гуруч курмаксиз бўлмайди дейишганидек ушбу шаҳарда ҳам камчиликлар йўқ эмас экан. Бу ерда жуда ҳам кўплаб инсонлар биз билан суҳбат қуришни, фикр алмашишни исташмади. Бир сўз билан айтганда улар билан мулоқот қилишнинг деярли иложи бўлмади. Бизнинг мақсадимиз бу эмас, сафаримизнинг асосий мақсади жаҳон чемпионатини Россия мамлакатидан эксклюзив тарзда сайтимизда ёриитиб бориш. Шу мақсад сари тушликдан сўнг навбатдаги манзилимиз томон йўлга чиқдик. Бизни олдинда Самара шаҳри кутмоқда.

Жаҳонгир Сотволдиев Актобе шаҳридан махсус.

Россияга сафар. 2-кун. Актобедан Самарага