Бугун жамоа хориж йиғини доирасидаги илк назорат учрашувида ўтказади. Клуб бош директори Рўзимбой Аҳмедов тайёргарлик ва таркибдаги ўзгаришлар ҳақида фикр билдирди.

"Машғулотларни кўнгилдагидек бошладик. Ҳаво ҳам ажойиб. Майдонлар ҳам идеал даражада. Машғулот ўтиш учун ҳамма шароит бор. Олдинда бизни 4 та назорат учрашуви кутиб турибди. Мана шу ўйинларда жамоамиз янада формага кириб олади деб ўйлайман. Чемпионат стартига яхши тайёргарлик ва кўтаринки руҳда етиб келамиз.

Ҳозирда асосий вазифа оғир юкламалардан сўнг тезроқ спорт формага кириб олишдир. Суперлигани 9 март куни бошлаймиз. Бунга оз вақт қолди. Жамоамиз бу фурсат ичида оптимал формага кириб олиши керак. Кунига 2 маҳалдан машғулотлар олиб бориляпти. Юкламалар берилмоқда. Таркибимиз шаклланиб боряпти. Яна 1-2 нафар футболчи қўшилиши эҳтимоли бор. Бу масала яқин кунларда ҳал бўлади. Ўйинимизга, тактикамизга мос футболчиларни жалб қиляпмиз.

Раҳбариятимизга, шахсан вилоят ҳокимимизга яратиб берилган шароитлар учун миннатдорчилик билдириб қоламан. Жамоамиз учун бу йил ўзгача бўлиши керак. Насиб қилса, Суперлигада яхши ўринлар учун курашамиз",- дейди Рўзимбой Аҳмедов.

Рўзимбой Аҳмедов: "Таркибга яна 1-2 нафар футболчи қўшилиши мумкин, Суперлигада яхши ўринлар учун курашамиз"