"Биринчи бўлимда ҳужумдаги ўйинимиз қовушмади. Биргина зарбани ҳисобга олмаганда бошқа вазиятларимиз бўлмади. Йигитларга стандарт вазиятларда эътиборлироқ бўлишни айтгандик. Стандарт вазиятдан гол урдик ва эътиборсизлик сабаб стандартдан гол ўтказиб юбордик. Ўйлайманки, ғалабага муносиб ўйин кўрсатдик. Мухлисларни ғалаба билан табриклайман", - дейди Рўзиқул Бердиев.

- Таркибда ўтган ўйинга қараганда ўзгаришлар бўлди. Бу "Бухоро"дан келиб чиқиб тузилдими?

- Таркибимиздан келиб чиқиб схемада ҳам ўзгаришга қўл урдик. Ўйинга энг яхши тайёр бўлган футболчилардан схема тузишга ҳаракат қилдик. Бугунги қароримиз шу билан боғлиқ.

- Стефан Чолович ўтган йили иккинчи даврада келиб катта ёрдам берган эди. Бугун ҳам захирадан тушгач ўйинни кескин ўзгартириб юборди. Унинг ўйини ҳақида...

- Чолович ва Кенжабоев бугунги режамизда бор эди. Булар асосан қарши ҳужумларда яхши ҳаракат қилади. Чоловичнинг ҳолати яхши. Фақат бугунги схемамизга тушмагани учун иккинчи бўлимда ўйини кучайтиришга туширишга қарор қилдик.

- "Насаф"нинг кейинги пенальтиларини Черан амалга оширадими?

- Черан бугунги ўйинда биз кутган ўйинни қила олмади. Нафақат пенальти балки ўйинда ҳам камчиликлар бўлди. Балки ҳамма ўйинда тўлиқ ўйнаётгани учун чарчоқ кузатилаётгандир. Унга ишонишда давом этамиз. Черан Ўзбекистонда жарималарни амалга оширадиган энг яхши футболчилардан бири ҳисобланади.

- "Насаф" бир неча кун олдин кубокдаги юришини бошлади. Кетма-кет кубоклардаги ғолибликдан сўнг ўтган йили омадсиз қатнашди. Бу йил жамоа кубокда курашадими?

- Ўтган йили чемпионликни мақсад қилиб кубок ва ОЧЛ ўйинларига иккинчи даражали бўлиб қараган эдик. Буни очиқ айтиш керак. Бу йил ундай бўлмайди. Ҳар бир турнирда ютуққа эришиш учун ҳаракат қиламиз.

Рўзиқул Бердиев: "Ғалабага муносиб ўйин кўрсатдик, Черанга ишонишда давом этамиз"