"Мағлубиятга учрадик. Жамоа жисмонан ва руҳан тайёр бўлмаса, ҳеч нарса ўхшамайди. Бизда нечанчи ўйиндирки шундай ҳолат кузатилмоқда. Бугунги ўйинда ҳисобда олдинда бора туриб ҳам уни ушлаб қололмадик. Биз рақиб дарвозаси олдида хавф яратолмадик. Шу сабабли мағлубият қабул қилиб олдик", – деди Бердиев.

- Жамоа чемпион бўлган бўлса, йигитларда қандай тушкунлик бўлиши мумкин? Болалар ўртасида қандайдир келишмовчилик борми?

- Йўқ, келишмовчилик йўқ. Ҳаммасини назорат қиляпмиз, фақат йигитларда олдингидек иштиёқ кўзга ташланмади. Бу натижага таъсир қилди. Ҳозир футболчиларни муҳокама қилиб, уларни айбдор сифатида кўрсатмоқчи эмасман. Уларга мавсум учун раҳмат. Лекин барчаси учун мураббий жавобгар. Айни пайтда оғир даврни бошдан кечиряпмиз. Бу мураббийлар учун қаттиқ зарба бўлмоқда. Футболчилар майдонда хато қиляпти, йўқ жойдан голлар ўтказяпти. Мен бунга урғу бериб, уларнинг хатоларини муҳокама қилиб ўтирмоқчи эмасман.

- Бир вақтлар Қашқадарё вилоятининг 3 жамоаси Суперлигада қатнашарди. Яна ушбу воқеликка яқинмиз. 4 декабрь куни "Шўртан" – "Олимпик" учрашуви бўлиб ўтади. Шу учрашув ва "Машъал"нинг Суперлигага чиққани ҳақида фикр билдирсангиз...

- Бу, албатта, Қашқадарё вилояти учун ёқимли. "Шўртан" ўтиш баҳсида "Олимпик" билан, "Қўқон-1912" "Металлург" билан беллашади. Барча жамоаларимизҳга омад тилаймиз. Бу вилоятимизда футболга берилаётган эътибордан далолат. Ўйлайманки, "Машъал" Суперлигада ўйнаш тажрибасига эга. Жамоа таркибни кучайтириб, ўзига яраша яхши ўринларда боради деб ўйлайман.

- "Насаф"нинг кейинги мавсумдаги мақсадлари ҳақида нима дея оласиз?

- Ҳозир бу нарса ҳақида аниқ фикр билдиролмайман. Буни кўпроқ клубдан сўраш керак. Ҳозирча мураббий сифатида бир нарса деёлмайман.

Рўзиқул Бердиев: "Ҳисобда олдинда бора туриб ҳам уни ушлаб қололмадик"