Рўзиқул Бердиев: - Асосий мақсадимиз кейинги босқичга чиқиш эди ва буни уддаладик. Барча футбол мухлисларини ушбу муваффақият билан табриклайман. Йигитларга алоҳида раҳмат айтаман. Ўйин тенг курашлар остида ўтди. Бугун асосий эътиборни ҳимояга қаратдик, чунки бизга натижа муҳимроқ эди.

Марко Станоевич: - Бугун "Ал Виҳдат" ҳам яхши ўйин ўтказди. Аммо биз жамоа учун боримизни бердик ва навбатдаги босқичга чиқдик.

- Аввало жамоани плей-оффга чиққани билан табриклаймиз. Жамоангиз ўйинни ҳужумкор бошлади ва учинчи дақиқадаёқ гол урди. Тезкор гол Сизнинг режангизда бормиди?

Рўзиқул Бердиев: - Тезкор гол уришга ҳаракат қилиш режада бор эди. Қарши ҳужумларда ўткирроқ, хавфлироқ ўйнашни истадик. Боя айтганимдек, бугун натижа учун ўйнадик. "Насаф"нинг кейинги босқичга чиқиши тарихий натижа бўлди. Шу сабабли кўпроқ ҳимояланиб, қарши ҳужумларда ўйнашимиз керак эди. Натижадан хурсандмиз.

- Маркога мураббий ҳақида савол бор. Ушбу мураббий "Насаф"да ишлаётганига узоқ йиллар бўлди. Ўтган йили жамоа ОФК Кубогида муваффақиятли қатнашди. 11 йил олдин эса ушбу мусобақада тарихий натижага эришилди. Хўш, мураббийингиз қийин ва хурсанд пайтларда қанчалик даражада ўзгаради?

Марко Станоевич: - Мураббийимиз муваффақиятларимизнинг асосий сабабчиси. У жамоа таркибидаги барча футболчиларнинг сифатларини, маълумотларини яхши билади. У билан ишлаш менга ёқади.

Рўзиқул Бердиев: "Тарихий натижа билан барча ўзбекистонликларни табриклайман"