Фурсатдан фойдаланиб Рустам Ашурматовнинг онасидан интервью олдик.

"Фарзандлар камолини кўриш, уларнинг орқасидан рахматлар эшитиш ота-оналар учун таърифлаб бўлмас қувонч. Ўғлим Рустамжоннинг шундай дўстлари, мухлислари борлигидан бошим кўкларга етди.

Рустамжон ёшлигидан бошқача меҳрли, беғубор бўлиб ўсган. Боғчада пайтлариданоқ устоз-мураббийларидан рахмат эшитишни бошлаганман. Дадам набирасининг футболчи бўлишини жуда хоҳлаганлари учун уни олти ёшида футболга олиб борганлар. Тоғаси ҳам футболчи бўлганлиги, бу касбнинг оғир тарафларини кўриб юрганим учун аввалига рози бўлмагандим. Лекин Рустамжоннинг ўзи қийинчиликлардан, меҳнатдан қочмади. Шу сабабли ҳам бугун юксак натижаларга эришиб бизни жудаям қувонтиряпти.

Айни дам қора кўзини кутаётган ҳар бир онанинг кечинмаларини бирдек ҳис қиляпман. Йигитлар озмунча ҳаракат қилишмади, Осиё давлатлари ичидан ярқ этиб чиқишганининг ўзи биз учун чексиз ғурур ва ифтихор бўлди. Бахтимизга доим соғ-омон, юртимизнинг фахри бўлиб, бахтли замонларда ўйнаб-кулиб юришсин. Фарзандларимиз бизнинг фахримиз!".

Гулшан Саъдуллаева ёзиб олди

Рустам Ашурматовнинг онаси: "Фарзандларимиз бизнинг фахримиз!"