Учрашувда майдон эгалари устунлик қилган бўлсада, "Металлург" сўнгги дақиқаларда гол уриб ғалабани нишонлади. Бекободликлар сафидаги тажрибали ижрочи Саламат Қутибоев жамоасига уч очко келтирган гол муаллифига айланди. Ушбу баҳсдан сўнг футболчи сайтимизга фикрларини билдириб ўтди.

- "Металлург" учрашувда кўпроқ ҳимояланишига тўғри келди. Бироқ сўнгги дақиқаларда кўпроқ ҳужумкорликка эътибор қаратди. Бу олдиндан ўйланган режа эдими?

- Аслида режамиз бошқача эди. Биринчи рақам остида тўп тепишимиз талаб этиларди. Лекин рақибимиз бунга йўл қўймади. "Қўқон-1912" ўйин давомида биздан анча яхши ҳаракат қилди. Муҳими якунда биз ғалабани тантана қилдик.

- Жамоанинг ўйинидаги ранг-баранглик кўрмоқдамиз. Аввалги мавсумларга қараганда кўпроқ тўпга эгалик қилмоқда ва ҳужумлар ташкил этяпти. Бу мураббийнинг ўзгаргани билан боғлиқми?

- Худди шундай. Фикрингизга қўшиламан. Мураббийимиз бизга агрессив ҳаракат қилган ҳолда, рақиб жарима майдончасига кўпроқ босим қилишимиз кераклигини таъкидламоқдалар. Вақт ўтгани сайин мураббийнинг фалсафаси ва услубига мослашиб борамиз.

- Бироқ футболчилар Жасур Абдураимовнинг услубини тезда ўзлаштириб олишгани сезилмоқда...

- Менимча мураббийнинг айтганларини тўлиқ бажара олаётганимиз йўқ. Лекин ҳаракат қиляпмиз. Ўйиндан-ўйинга ҳаммаси яхшиланиб боришига ишонаман.

- Ўйин давомида жамоа кўпроқ марказда тўпни назорат қилишга уринди. Натижада қанотларда юзага келган бўшлиқлардан рақиб кескин вазиятлар яратди...

- Майдонда бир-биримизга яқинроқ ўйнаб ҳужум қилишимиз ва ортга тезроқ қайтишимиз керак эди. Бу олдиндан ўйланганди. Ғалаба билан мухлисларимизни табриклаб қоламан.

Саламат Қутибоев: "Рақиб яхши ўйнади. Лекин якунда биз ғалаба қозондик"