“Темирйўлчилар”нинг бундай натижаларга эришишида жамоа футболчиси Салим Мустафоевнинг хизматлари бор. Биз Мустафоевнинг ўтган мавсум ҳақидаги фикрлари билан қизиқдик.

- Бу йилги чемпионат “Локомотив” учун қанчалик омадли келди?
- Бу йилги мавсум ўтган йилгидан анча қизиқарли ўтди. Ким чемпион бўлиши мавсум тугамасидан олдин маълум бўлиб улгурди. Чемпионатда асосий таъқибчимиз “Бунёдкор” клуби мавсум сўнггида очко йўқотгани учун биз муддатидан аввал ғолибликни қўлга киритдик. Турнир жадвалига эътибор берган бўлсангиз, тўртинчи ўриндан еттинчи ўрингача кураш жиддий тарзда кечди. Бешинчи поғонани эгаллаган жамоада ҳам юқори ўринга кўтарилиб олиш учун имкониятлар етарлича бўлди. Очколар тафовути ҳам у даражада катта бўлмади. Очиғини айтсам, бу йилги чемпионат “Локомотив” учун омадли келди.

- Жорий йилги чемпионатимиз ўтган йилгисидан нимаси билан фарқ қилди?
- Ўтган йилги чемпионатимиз ҳам қизиқарли ўтганди. Ўшанда сўнгги турда ким чемпион бўлиши хал бўлганди. Лекин ўтган йили турнир жадвалида учта етакчи жамоа барча клублардан илгарилаб кетган эди. Бу йил эса ундай бўлмади. Деярли барча жамоалар етакчи клублардан очко тортиб олди. Кўплаб жамоалар бизга яхшигина бошоғриқ бўлди. Мавсум бошида олдимизга чемпионликни ва Ўзбекистон кубогини қўлга киритиш вазифаси қўйилган эди. Бу вазифани уддаладик. ОЧЛда ҳам чорак финалга қадар етиб бордик. Менимча, бу йилги мусобақаларда қониқарли иштирок этдик, деб ўйлайман.

- Сиз Самарқанд шаҳрида катта бўлгансиз. Кубок финали ҳам айнан Самарқанд шаҳрида ўтказилди. Бироз вақт ўтиб сиз учун қадирдон бўлган “Динамо” стадионига ташриф буюрдингиз. Ўша ўйинда кўнглингиздан қандай кечинмалар ўтди?
- Ўзбекистон кубоги финал босқичи айнан Самарқанд шаҳрида ўтказилишини эшитиб, жуда ҳам хурсанд бўлдим. Барибир, ўз туғилим ўсган жойим. Финал учрашувини томоша қилиш учун кўплаб мухлислар стадионга ташриф буюришини олдиндан билгандим. Самарқандда футболни жуда ҳам севишади. Самарқанддаги футбол мухлислари “Динамо” стадионини тўлдириб туришганини кўриб, жуда ҳам хурсанд бўлдим. Албатта, учрашув хаяжонли кечди. Ўзбекистон кубогини ҳам қўлга киритиб, “олтин дубл”га эришдик. Интернет сайтида ўқиб қолдим, биз “олтин дубл”ни қўлга киритган бешинчи жамоа эканмиз. Бундай натижаларга ўз хиссамни қўшганимдан ва шундай ютуқларни қўлга киритганимдан жуда ҳам хурсандман.

- ОЧЛ баҳсларидада мунтазам равишда майдонда тўп тепдингиз. Сизга Осиё жамоаларидан таклифлар бўляптими?
- Ҳозирча ҳеч кимдан жиддий таклифлар ҳам, қизиқишлар ҳам бўлмади. Балки, клуб мутасаддиларига таклиф билан чиқишгандир. Шахсан ўзимга ҳеч ким таклиф билан мурожаат қилмади.

- Собиқ клубингиз “Динамо” келаси йили олий лига баҳсларида иштирок этади...
- Албатта, бундан жуда ҳам хурсанд бўлдим. Аввалдан “Динамо” олий лигада иштирок этишини истагандим. “Динамо”дан таклиф бўлса, қандай қарорга келаман, билмайман. Буни вақт кўрсатади. Ҳозир мен “Локомотив” клуби футболчисиман. Иложи борича “темирйўлчилар” сафида узоқроқ вақт қолишни истайман. Яна чемпионликни ҳимоя қилишни истайман.

- “Локомотив” жамоаси учун чемпионатимизда қайси жамоага қарши учрашув жуда ҳам оғир бўлди?
- Бундай оғир ўйинлар кўп бўлади. Мисол учун Қаршининг “Насаф” жамоаси билан қийин ўйин ўтказдик. “Пахтакор” билан сафардаги учрашув ҳам қийин бўлди. “Бунёдкор” билан бўлган баҳсларда ҳам қийинчилик билан ғалабани қўлга киритдик. Биринчи даврада сафарда “Металлург” билан бўлган ўйин ҳам жуда ҳам оғир кечди. Лекин жароҳатим борлиги сабабли ўша учрашувни ўтказиб юборгандим. Ўша баҳсда ўн киши бўлиб қолиб ҳам мағлубиятдан қутилиб қолгандик.

- Бу йилги чемпионатимизда 3 та йил футболчисини санаб бера оласизми?
- Темурхўжа Абдухолиқов тўпурар бўлди. “Бунёдкор” жамоаси ҳужумчиси Элдор Шомуродовни ҳам ушбу учликка киритса бўлади. Икром Алибоев ҳам йил футболчиси бўлишга хақли, деб ўйлайман. Агарда санаб чиқадиган бўлсак, йил футболчисига номзод бўладиган футболчилар жуда кўп. Мана, Жалолиддин Машарипов ҳам “Пахтакор” таркибида анча мазмунли ўйин кўрсатди. Миллий терма жамоадан чақирув олди. Сардор Мирзаевни ҳам қўшса бўлади. Тўғрисини айтсам, ҳеч кимни ажратиб кўрсата олмайман.

- Келажакдаги мақсадлар қандай?
- Кейинги йил олдимизга бундан-да юқорироқ вазифа қўйилади. Энг оғири-чемпионликни ҳимоя қилиш. Менимча, келаси йили чемпионлик ва Ўзбекистон кубогини ҳимоя қилиш вазифаси қўйилса керак. Чемпион бўлиш қийин, лекин чемпионликни ҳимоя қилиш ундан-да қийин.

Жаҳонгир Сотволдиев суҳбатлашди.

Сайтимизнинг Telegram даги каналига обуна бўлинг - telegram.me/championatasia

Салим Мустафоев: “Чемпионликни ҳимоя қилиш ҳар доим қийин бўлган”