“Қатар клубларидан бир қатор таклифлар бор эди. Таклиф билдирган барча клуб шарт-шароитлари билан танишиб чиқиб "Ал Сайлия" жамоаси таклифини қабул қилдим.

Куни кеча жамоанинг барча шарт-шароити билан танишиб чиқдик. Насиб қилса ушбу клубда чиройли ўйин кўрсатишга ҳаракат қиламиз.

“Локомотив” клубидаги жамоадошим Темурхўжа Абдуҳолиқов билан "Ал Сайлия"да бирга тўп тепадиган бўлдик. Бу Темурхўжа учун ҳам, мен учун ҳам жуда ҳам зўр бўлди. Иккимиз ҳам бундан хурсанд бўлдик. "Ал Сайлия" клуби олдига яхши ўйин кўрсатиб юқори ўринларни эгаллаб, чиройли натижа кўрсатиш вазифаси қўйилган.

Жамоада биздан ташқари Руминия, Баҳрайндан легионер футболчилар бор. Қатар клубида ўзимизни синаб кўришни истаганимиз учун ушбу жамоани танладик.

"Ал Сайлия" билан бир ярим йилга шартнома имзоладик. Клуб раҳбарияти бизга жуда ҳам зўр шароитлар яратиб берди. Уй, машина деганларидек барчасини амалга ошириб беришди. Бу борада ҳеч қандай муаммо йўқ. Жамоа мураббийи тунислик экан.

Тил борасида бироз муаммолар бор эди. Лекин бизга таржимонлар тақдим этишди, ҳаммаси кўнгилдагидек. Бизни шунчалик қўллаб-қувватлаб турган мухлисларимизга, барча шарт-шароитлар қилиб берган “Локомотив” клуби раҳбариятидан тортиб, барча ишчиларига ўз миннатдорчилигимни билдираман. “Локомотив” жамоаси орқали шу даражага етишдим. Бир умр ушбу жамоадан қарздорман”, - дейди "Ал Сайлия" футболчиси Санжар Шоаҳмедов.

Жаҳонгир Сотволдиев

Санжар Шоаҳмедов: “Абдухолиқов билан бир жамоада тўп тепишимиз зўр бўлди”