У 15-турда “Машъал” дарвозасига учта гол уришга муваффақ бўлди. Ярим ҳимоячи бўлса-да, ҳужумчиларнинг вазифасини қойилмақом тарзда бажармоқда. Ҳар бир учрашувда Рашидов ўзини кўрсатиб келмоқда. Унинг келажаги порлоқ эканлигига шубҳа бўлиши мумкин эмас. Фақат ўз устидан ишлашдан тўхтаб қолмаслиги лозим.

- “Бунёдкор” – “Машъал” учрашувида учта тўп киритдингиз ва жамоангизнинг 5:1 ҳисобидаги ғалабасига катта ҳисса қўшдингиз. Мазкур ўйин фаолиятингиздаги энг ёрқин беллашув бўлиб қолдими?
- Шу кунгача ўтказган ўйинларим орасида энг қувончилиси сифатида Чемпионлар лигасининг гуруҳ босқичида Қатарда “Ал Жаиш” жамоасига қарши кечган учрашувни айтган бўларди. Ўшанда охирги дақиқада муҳим ва ҳал қилувчи гол муаллифи бўлганман. Бундан ташқари “Олмалиқ” билан ўйинимизда ҳам хет-трикка эришгандим ва биз 0:4 ҳисобида ғалаба қозонгандик. Шу боис ўша учрашув ҳам мен учун қувончга бой бўлганди. Буларнинг қаторига “Машъал” билан ўйинни ҳам қўшсам бўлади.

- Умуман олганда, ўйин хусусида нималарни айта оласиз? Йирик ҳисобдаги ғалабани мухлислар соғиниб қолишганди.
- Биз учун қайд этилган натижани кутилмаган ҳолат деб айта олмайман. Негаки, учрашувдан аввал рақибимизнинг кучли ва кучсиз томонларини яхшилаб ўрганиб чиққандик. Сергей Иванович қандай тактикада ўйнашимизни ўргатиб чиқди. Албатта, ғалаба қозонишимизга ишонгандик. Ҳаммаси жамоамиз учун кўнгилдагидек кечди ва бешта тўп киритишга муваффақ бўлдик. Бу орқали мухлисларимизни хурсанд қилганимиздан бахтиёрмиз.

- 5:1 ҳисобини инобатга олганда, “Бунёдкор” катта қийинчиликка дуч келгани йўқ, тўғрими?
- Ҳа, тўғри. У қадар катта қийинчиликка дуч келмадик.

- “Машъал” ҳақида нима деган бўлардингиз?
- “Машъал” ёмон жамоа эмас. Улар ҳам бизга қарши яхши тайёргарлик кўришган. Биринчи голни ургунимизга қадар анча қийналдик. 18-дақиқада ҳисобни очганимиздан кейин ўйинимиз ҳам “очилиб” кетди.

- Хет-трикка ниманинг эвазига эришдим деб ўйлайсиз?
- Жамоадошларим қўллаб-қувватлашди. Керак пайтда пас билан таъминлаб туришди. Голларимнинг иккитасини стандарт вазиятдан киритдим. Машғулотларда қўллаган усулларимни айнан жарима зарбаларини бажариш орқали қўлладим.

- Биринчи голингизни чамаси 28-30 метр узоқликдаги стандартдан киритдингиз. Ўша пайтда нимани ўйладингиз?
- Зарба бераётганимда фақат тўпга қарайман. Шу боис бу ўйинда ҳам жарима зарбасини амалга оширишдан олдин нигоҳларимни фақат тўпга қаратгандим. Бутун ҳаёлимни бир жойга йиғиб оёғимни тўпга мослаштирдим. Қандай зарба беришимни ҳаёлимда ўтказиб олгач худди ўша вазиятни амалда бажаришга муваффақ бўлдим.

- Умуман, зарбани бажараётганингизда таваккал тепдингизми ёки аниқ мўлжалга олганмидингиз?
- Тўғри, гол бўлган жойга тўпни аниқ тепаман деб ўйламагандим. Аммо зарбани аниқ амалга оширдим.

- Ярим ҳимоячи бўлсангиз-да, ҳужумчилардан қолишмаган ҳолда бир нечта голлар муаллифига айланиб боряпсиз. Рақиблар дарвозасини кўпроқ ишғол қилаётганингиз нимадан далолат беради?
- Нимадан далолат дейсизми? Мураббий мени кўпроқ ҳужумчиларга фаол тарзда ёрдамлашишимни тайинлайди. Ҳимоядан кўра, кўпинча ҳужумда ёрдам бераман. Шунинг учун голларим сони кўпаяётган бўлиши мумкин.

- Шунингдек, стандарт вазиятлардан имкони қадар самарали фойдаланаётганингиз ҳам “Бунёдкор”га фойда келтиряпти.
- Машғулотлар пайтид мураббий жарима зарбаларини мен бажаришимни хоҳлашади ва бу борада кўплаб машқлар қиламан. Стандарт ҳолатдан қандай қилиб самарали бажариш юзасидан машғулотларда ўз устимда кўп ишлайман.

- Иккинчи даврада мавсум янада қизимоқда. “Бунёдкор” ҳаммасини яхши бошлади. Лекин унинг асосий рақиблари ҳам мавсумнинг иккинчи қисмини муваффақиятли бошладилар.
- Олдимизда яна 11та ўйин турибди. Чемпионат охиригача ўртадаги 8 очкони йўққа чиқаришга ҳаракат қиламиз. Ҳозирдан бир нима деб бўлмайди. Ўйлайманки, барчасини вақт кўрсатади. Ўйинларимиз бор экан, демак имконият ҳам бор.

- “Насаф” – “Локомотив” ўртасидаги учрашувда қайд этилган 2:5 ҳисобини қандай қабул қилдингиз?
- Албатта, бундай ҳисоб бўлишини кутмагандим. Лекин “Локомотив”нинг ғалабасига ишонгандим.

- Нима учун “Локо”нинг ғалабасига ишонгандингиз?
- “Локомотив”нинг тажрибали ўйинчилар кўп. “Насаф” билан ҳам ўйнаганмиз. Шунинг учун иккала жамоани солиштирганда, “Локо”нинг муваффақият қозонишига ишонганман.

- Айтмоқчиманки, “Локомотив” карвонбоши бўлиб турганди. Шу боисдан бу жамоанинг очко йўқотгани “Бунёдкор” учун яхши эмасмиди?
- Уларнинг очко йўқотиши бир тарафдан қараганда биз учун пюс бўларди. Тўғриси, рақбимиз ҳақида ҳеч нима дея олмайман.

- Бу йилги мавсум сиз учун ҳар тарафлама яхши кечяптими ёки нимадандир қониқмаяпсизми?
- Худога шукур, ҳозирча яхши. Биринчи даврада унчалик қониқиш бўлмаганди. Айниқса, мавсум бошида нимагадир ўйиним кўнгилдагидек эмасди.

- Сизнингча Сергей Лушан қандай мураббий?
- Табиийки, яхши мутахассис. Унинг тактикалари бизга ёқяпти. Кўпроқ европача услубда ишлайди.

- Лушаннинг тактикасига мослашиб бўлдингларми ёки бу жараён давом этяптими?
- Мослашиш жараёни ҳали ҳам давом этмоқда. Ҳали 100 фоизга кўникканимиз йўқ. Аммо умид қиламанки, вақт ўтган сари Сергей Лушаннинг услубини пухта ўзлаштириб оламиз.

- Навбатдаги турда “Олмалиқ” меҳмони бўласизлар. Бу учрашув турнинг марказий ўйинига айланади. Ўтган йили эса олмалиқликлар дарвозасига учта гол ургансиз.
- Яна бир бор ғалаба қозонишни ният қиламиз. Лекин “Олмалиқ”қа қарши учрашув ҳар қачонгидан ҳам қийин ўтиши аниқ. Шу пайтгача улар билан ўтказган ўйинларимиз осон кечмаган. Гарчи бизга оғир бўлса-да, ютишга уриниб кўрамиз.

- Мухлисларни борган сари голларингизга кўниктириб қўймоқдасиз. Шу боис яна сизнинг ижроингизда гол кўришни кутишмоқда.
- Худо хоҳласа ҳаракат қиламан. Балки яна дубл ёки хет-трикка эришарман. Буни Худо билади.

- Дарвоқе, “Машъал” дарвозасига киритган учта голингизни кимга бағишладингиз?
- Голларимни кўпинча ота-онамга, яқинларимга бағишлайман. Қолаверса, бизни қўллаб-қувватлаб турган мухлисларимизга ҳам бағишлайман.

- Охирги пайтларда ўйин бўйича ўсишга эришяпсиз. Бундай паллада ёш бўлганингиз туфайли юлдузлик касалига дуч келиб қолишингиз эҳтимолдан ҳоли эмас. Бу ҳолатни сезиб боряпсизми?
- Юлдузлик касали озгина бўлса-да, сезилиб қолса ўзимни босишга ҳаракат қиламан. Бу ҳолат ҳамма ўйинчида ҳам бўлади. Ҳар бир учрашувдан олдин ва кейин дадам менга қўнғироқ қилади. Ўзи футболнинг ичида юргани учун уни яхши тушунади. Шу сабабли ҳар доим юлдизлик касалига тушиб қолмагин деб уқтириб келади.

- Сиз учун юлдузликдан қочиш қийин бўлмаяптими?
- Юлдузлик касалига учрамайман ва бу ҳолат қийин бўлмаяпти.

- Укангиз Санжар Рашидов “Сўғдиёна” шарафини ҳимоя қиляпти. Унинг ўйинлари ҳам сиз учун қизиқ бўлса керак?
- У билан кўпроқ дадам гаплашади. Мен ҳам Санжарга керакли маслаҳатларни бериб тураман. Лекин нимагадир “Сўғдиёна” жамоасида унга унчалик ишонч билдиришмаяпти. Агар ишонч билдиришса оқлайди деган умиддаман.

- Сиз ҳам ўз вақтида “Сўғдиёна”да тўп сургансиз ва кейинчалик “Бунёдкор”га кетдингиз. Жиззахликларнинг ёшлар таркибида ўйнаб юрган ўйинчи вақт ўтиб “Бунёдкор”нинг асосий таркибидан жой олди. Бу ҳолатда нима дея оласиз?
- Гарчи тўлиқ бўлмаса-да, озгина ишончим бор эди. Дадам ҳам “Бунёдкор”га бориб асосий таркибга кириш учун кураш деб уқтирганди. Ҳаммасига меҳнатим орқали эришяпман. Боз устига Миржалол Қосимов мени ёшлар таркибидан асосий жамоага ўтказганди.

- Қосимов фаолиятингизда муҳим аҳамият касб этадими?
- Ҳа, катта аҳамиятга эга. Мени катта футболга олиб чиққан Миржалол Қўшоқович бўлади. Қосимов ҳар томонлама яхши мураббий.

- Ютгандан кейин ғалабани қандай нишонлайсиз?
- Масалан, “Машъал” билан ўйиндан кейин ғалабани уйимдагилар билан нишонладим. Албатта, жамоадошларим ҳамда мураббийларимиз ҳам қувончимизни баҳам кўрдик.

- Футболчи сифатида қандай мақсадингиз бор?
- Биринчи навбатда миллий терма жамоа билан 2018 йилги жаҳон чемпионатида қатнашиш мақсадидаман. Ўзбекистон шаънини муносиб ҳимоя қилиб халқимизни хурсанд қилишни истайман. Бундан ташқари Европа майдонларида ҳам тўп суришни ният қиламан.

- Қайси чемпионатда ўйнашни истайсиз?
- Испания чемпионатида тўп суришни хоҳлардим.

- Нима учун?
- Қандайдир Испания футболи менга ёқади. Ёшлигимда бу чемпионатни кузатиб бораман.

- Қайси клубга мухлислик қиласиз?
- “Реал”га!

- Сизни қачон хорижда кўришимиз мумкин?
- Чет элда тўп суриш ниятим бор. Бир-икки йилдан кейин легионер сифатида хорижда фаолиятимни давом эттирмоқчиман.

- Бунгача хориждан таклифлар бўлганми?
- Тўғриси билмайман. Асосан мураббийлар ҳал қилишади. Албатта, илгари орқаваротдан эшитганман. Лекин ўзимга айтмагунича ишонмайман. Бизнинг биринчи навбатдаги мақсадимиз Ўзбекистон Кубогини қўлга киритишдан иборат. Шунингдек, чемпионикка ҳам ҳаракат қиламиз. Кубокка яқин турганимиз учун уни қўлга киритмоқчимиз. Ўтган йили “Пахтакор”ни финалда ютганимиздан кейин ҳам роса қувонгандик. Бу сафар ҳам ўша қувончни ҳис қилмоқчимиз.

ФИРДАВСХОН суҳбатлашди.

Сардор Рашидов: “Мураббий ҳужумчиларга ёрдам беришимни истамоқда”