Бу турда пешқадам ўзгарди. Шу пайтгача турнир жадвалида карвонбошилик қилиб келган "Ал Ҳилол" ўз ўрнини "Ал Наср"га бўшатиб берди. Бу жамоаларнинг ўзаро ўйинида "Ал Наср"нинг қўли баланд келиб 3:2 ҳисобида ғалаба қозонди.

Ҳозирда жамоалар ўртасидаги фарқ бир очкони ташкил этяпти. Бу эса кураш охиригача қизийди деганидир. Биз учун таниш жамоалардан бири "Оҳод" ўз майдонида "Ал Шабаб"ни қабул қилиб 1:2 ҳисобида ютқазиб қўйди. Умуман олганда бу жамоа Нестеров кетганидан бери биронта ўйинда ғалаба қозонмади. Нестеров борлигида эса иккита учрашувда зафар қучганди.

"Локомотив"нинг ОЧЛдаги рақиби "Ал Иттиҳод" "Ал Файсали" майдонига сафар уюштириб 2:3 ҳисобида ютқазиб қайтди. "Ал Иттиҳод" сафида Маруан да Коста билан Гарри Родригес гол муаллифи бўлишди. Шуни айтиш керак, кеча жиддаликлар Қирол Кубогида "Ал Батин"ни 4:3 ҳисобида мағлуб этишди.

Пешқадам "Ал Наср" кейинги турни 4 апрель куни "Ал Раед"га қарши ўтказса, "Ал Ҳилол" ҳам шу куни "Ал Ҳазм" меҳмони бўлади. Тўпурарлар рўйхатида "Ал Наср" ҳужумчиси Абдураззоқ Ҳамдаллаҳ 22та гол билан биринчи ўринда кетмоқда. Иккинчи ўриндаги Леандре Тавамба ("Ал Таавон") ҳисобида 19та гол бор. 3-ўринни эса "Ал Ҳилол" форварди Бафетимби Гомис 17та гол билан эгаллаб турибди.

Саудия Арабистони чемпионати. Чемпионлик учун иккита жамоа курашяпти