"Рақибни табриклайман. Учрашув ташкилотчиларига миннатдорчилик билдираман. Майдон идеал ҳолатда эди. Бизнинг ўйин услубимизга тўлиқ мос келадиган майдон. Йигитларимиз учинчи ўйинни ўтказишди, ўзларини яхши кўрсата олишди. Жисмоний томондан ишлашимиз керак. Ёш футболчиларимиз катта акаларига қарши ўйнашди. Техник томондан ютқазмадик дея оламан. Бир неча вазиятлар ҳам яратдик. Йигитларга ҳаракат қилганлари учун раҳмат айтаман. Хатоларни келгусида тузатишга ҳаракат қиламиз", -дейди Сервер Жепаров.

– Жамоангиз икки Суперлига ва битта Про лига клуби билан ўйнади. Бу қанчалик тажриба бўлди?

– Катта тажриба олдик. Мураббий сифатида ҳам. Бу каби рақибларга қарши камчилигингиз яққол кўринади.

– Жамоамиз ёш футболчилардан тузилган дедингиз. Улар орасида турли ёш тоифасидаги терма жамоаларимизда ўйнайдиганлари ҳам борми?

– Албатта, 2006, 2007 ва 2008 йилларда туғилган футболчиларимиз терма жамоаларда ўйнашади. Биз ўз академиямиздан футболчи олишни мақул кўрамиз.

– Жамоа олдига Про лига йўлланмаси қўйилганми?

– Баланд мақсадлар қўямиз. Ҳозирда биз биринчи лигада ўйнаяпмиз. Кўрамиз. Иштаха таом пайтида келади. Молиявий томон жуда муҳим. Яхши жамоа учун молиявий тарафлама яхши қўллов бўлиши лозим.

– Клуб ким томонидан молиялаштирилади?

– Шахсий маблағ эвазига молиялаштирилади. Баъзи жойда мен, баъзи жойда Сергей Султанович томонидан пул сарфланади.

Сервер Жепаров: "Нефтчи" каби рақибларга қарши камчиликлар яққол кўринади"