"Ўйин бизнинг назоратимизда ўтди, бунга аниқ бир сабабини кўрсата олмайман. Балки улар ўйинга етарлича тайёрланмагандир, балки биз биринчилардан бўлиб тўпни ўзимизга бўйсундирганимиз фойда бўлди", - дейди Сервер Жепаров.

- Биринчи голдан кейин жамоамиз ҳимояга ётиб олди, аммо хатоликлар кўп бўлди...
- Тўғри, бунга ўзимиз сабабчимиз. Гол уриб олгандан кейин орқароқда кучни тежашни мақсад қилдик. Аммо шунда ҳам тўп бизда бўлиши керак эди. Афсуски, 2-3 тўп узатилишидан сўнг хатоликлар келиб чиқди. 10 дақиқа ўтиб ўзимизга келиб олдик ва яна ҳужум қилиш навбати бизга келганди.

Терма жамоамизнинг сўнгги иккита йиғинидан келиб чиқиб бир нарсага амин бўлдим. Биринчиси легионерларсиз бизнинг терма жамоа биронта натижага эриша олмайди. Яъни, ўзлари терма жамоани елкаларида кўтара олмайдилар, аслида бунга қодирлар. Фақат бунинг учун терма жамоа билан камида 2-3 ҳафта давомида бўлиб, 2та ўйинда майдонга тушишлари керак. Сабаби олий лигамиздаги ўйинларга улар терма жамоада бўлгани каби жиддий тайёрланмайдилар. Чунки ҳаммаси маълум. Тошкент ва БААда бўлиб ўтган йиғинлардан хулосам шуки, терма жамоага чақирилаётган олий лига футболчиларимиз сўнгги кунга келиб ўз формаларига эга бўлиб оляптилар. Эга бўляптилар ҳамки, йиғин якунига етиб, яна олий лигага қайтишяпти. Сервер Кореяга, Одил Россияга, Турсунов Украинага... Табиийки у ерда улар ўз устиларида жиддий ишлайдилар ва кейинги йиғинга ҳам қандай кетган бўлсалар, шундай қайтадилар. Маҳаллий футболчиларимиз эса афсуски, иккинчи йиғинга яна эски ҳолатда келяптилар. Мазкур ҳолат бўйича жамоа сардори сифатида Жепаровнинг фикрлари мен учун қизиқ эди.

- Албатта, олий лигамиз кучли бўлса, терма жамоамиз бугунгидан анча кучли бўлади. Агар ҳар турда жиддий ўйинларда майдонга тушсангиз, кучингизга куч қўшилиб бораверади. Мен ҳозир олий лиганинг ҳолати билан таниш эмасман, аммо биз ўйнаган пайтимиз нари борса 5та ўйинга жиддий тайёрланардик. Бу жуда кам. Кореяда эса бундай ўйинлар тўлиб ётибди. 36та ўйин ўйнаймиз, кубок баҳсларини қўшсангиз 40тага етади. Ўзбекистонда эса 26та ўйин. "Насаф", "Бунёдкор", "Локомотив" ва "Пахтакор" жамоалари ўртасидаги ўйинларни инобатга олмаса, қолган ўйинларда шундай шиддатни кўрасизми? Агар ҳар доим кучли жамоаларга қарши ўйнайверса футболчилар, терма жамоамизга ҳам яхши.

- Бугунги ўйинлардан келиб чиқиб терма жамоадаги ёшларнинг келажаги ҳақида нима дея оласиз?
- Улар кучли, олий лига кучсиз дейлик, лекин ўз устиларида ишлашлари учун тўсиқ йўқ деб ўйлайман. Бизнинг олий лигамизни деярли чет эл скаутлари кузатмайдилар. Агар бизда чемпионат бошқача бўлганида кўплаб футболчиларимиз чет элда юрган бўлардилар. Арзонга бўлса ҳам футболчиларни чет элга юборавериш керак. Юборганда ҳам захирага эмас, бироз ўртамиёна бўлса-да, Европага кетгани маъқул. Энг камида Япония, Жанубий Корея ва Хитойга. Агар Хорватия, Австрия каби чемпионат бўлса, иккиланиб ҳам ўтирмаслик керак.

Нодирхўжа Юлдашев

Сервер Жепаров: "Энг камида Шарққа кетиш керак"