“Баҳс оғир бўлишини билардик – рақиб қаторасига олти ўйиндан буён ғалаба қозониб келаётганди. Бу ғалабаларнинг бири “Бернабеу”да қўлга киритилганди. “Реал Сосьедад” Испания кубоги финалчиси, улар тўпни жуда яхши назорат қилишади, таркибда яхши футболчилар жамланган.

Агар алоҳида вазиятларни ҳисобга олмасак, биз тўпни ўз назоратимизда сақлаб турдик. Баъзида бизнинг дарвозамиз олдида муаммолар юзага келди, аммо биз ҳам рақиб жарима майдончаси ичида кўплаб хавфли ҳужумларни ташкил этдик. “Барселона” VAR тизими боис ғалаба қозонди. Пеналти белгиланган вазият менга яхши кўринмади, чунки захира ўриндиғи вазиятдан анча узоқда жойлашган.

Яққол гол киритиладиган вазият яратиш учун сабр билан ҳужум ташкил этиш керак. Баъзида биз жудаям шошамиз ва бу бизни мағлубиятга етаклайди. Аммо рақиб бизга босим ўтказиб, олдинга ўтар экан, уларда бўш зоналар пайдо бўлади ва биз бундан унумли фойдаланишга уринамиз. Янада яхшироқ бўлишга интилаяпмиз, аммо бу осон иш эмас.

Бизда кучли ва руҳан чиниққан жамоа бор. Бу менга ёқадиган жиҳат. Биз оғир ўйинда ғолибликка эришдик ва энди “Реал”ни ҳам таслим этишимиз керак”, дея Сетьеннинг сўзларидан иқтибос келтирмоқда Marca нашри.

Баскликларга қарши беллашувда “Барселона” ҳужумчиси Лионель Мессининг пеналтидан киритган голи каталонияликларга ғалаба келтирди. Ўша вазиятда тўп “Сосьедад” ҳимоячиси Робен Ле Норманнинг қўлига тегди. Ҳакам аниқ қарорга келиш учун VAR тизимига мурожаат қилди ва вазиятни қайта кўриб чиқиб, меҳмонлар дарвозасига пеналти белгилашга қарор қилганди.

Сетьен: “VAR туфайли ғалаба қозондик”