Майдон эгаларидан жамоа сардори Жавлон Иброҳимов ҳамда мавсумни юқори кайфиятда ўтказаётган Хуршид Ғиёсов гол муаллифига айланишди.

Биз учрашувдан сўнг ўйинни бошланғич таркибда бошлаб, 76-дақиқада ўз ўрнини Филип Райевацга бўшатиб берганҳужумчи Шаҳзод Нурматовдан интервью олдик.

- Шаҳзод, «Насаф»га қарши марказий ўйинда ғалаба қозондинглар. Мазкур учрашувга қандай таъриф берган бўлардингиз?

- Ўйин кутилганидан ҳам қийин кечди. Айниқса, кетма-кет мағлубиятлардан сўнг бизда руҳий ҳолат яхши эмасди. Очиғи, шу нарса панд бериб қўйишидан чўчигандик. Мураббийимиз учрашув олдидан биз билан яхшигина гаплашиб олдилар.

Ҳамма бундан аввалги мағлубиятларни унутиб, бор эътиборини шу баҳсга қаратди. Бу ҳолатда фақат ўз кучимизга таянган ҳолда вазиятдан чиқиб кетишимиз мумкинлигини билардик.

- Миржалол Қосимов сизларни қандай руҳлантира олди?

- Қандай бўлмасин, бу ўйинда ғалаба қозонишимиз кераклигини айтди. Фақат шу йўл билан қийин вазиятдан чиқиб кетишимиз мумкинлиги ва энг муҳими, барчаси ўз қўлимизда эканлигига ишонтира олди. «Ташқаридан келиб, ҳеч ким бизга ёрдам бермайди», деди.

- Учта мағлубиятнинг ҳаммаси ҳам «Бунёдкор»нинг ўзигагина боғлиқ ҳолатда рўй бердими?

- Ҳа, фақат ўзимизга боғлиқ, деб ўйлайман. Айбни ўзгалардан излашни ёқтирмайман. Аслида, энг осони ҳам шу бўлса керак, яъни айбни бировдан қидириш.

- Тушкун кайфиятдан чиқиб кетдинглар, деб ҳисобласак бўладими?

- Муҳим ўйинда ғалаба қозондик ва бу билан турнир жадвалида иккинчи ўринга кўтарилиб олдик. Ўйлайманки, омадсиз ўйинлар ортда қолди ва чемпионатнинг қолган учрашувларида очко йўқотмасликка интиламиз.

- Жамоада молиявий муаммолар йўқ, деб бўлмайди. Бундан ташқари, атрофда янграётган турли гап-сўзлар ҳам сизларга салбий жиҳатдан таъсир ўтказмай қолмайди, тўғрими?

- Албатта, таъсири бўляпти. Лекин бундай мураккаб вазиятдан фақат қозонилажак ғалабалар эвазига чиқиб кетиш мумкин. Буни яхши тушуниб турибмиз. Агар тушукунликка тушиб қолсак, натижа ёмон бўлса бўладики, асло ижобий кўриниш олмайди.

- «Бунёдкор»нинг мавсум учун қўйилган вазифалари ўзгармайдими?

- Йўқ. Ҳар доимгидек, чемпионлик учун курашамиз. Бунинг имкони бор, деб ўйлайман. Ҳали ўйинлар етарли. Асосий кураш олдинда. Иккинчи босқич кўп саволларга жавоб беради.

- Суперлиганинг ортда қолган тур ўйинлари ҳақида умумий фикрингиз қандай? Ҳали кўп нарса ўзгариши мумкинми? Ёки сценарий шу ҳолатда давом этармикан?

- Менимча, ҳали кўп нарса ўзгаради. Турнир жадвалидаги ҳозирги кўриниш ҳар бир турдан кейин ўзгаради, десам янглишмасак керак. Бундай дейишимга ортда қолган 10та тур ўйинлари ва уларда қайд этилган натижалар сабаб бўляпти.

Ўзингиз гувоҳи бўлдингиз, етакчи жамоаларимиз ҳеч бир учрашувда осон ғалабага эришишмади. Бундан кейинги турларда ҳам ҳеч кимга енгил бўлмайди.

Турнир жадвалининг қуйи қисмидаги жамоалар ҳам етакчилардан очко тортиб оляпти. Бу чемпионатимизнинг кучайиб бораётганидан дарак бериб турибди.

- Биринчи босқич якунларига кўра кучли олтиликка кирган жамоаларнинг 7-12-ўринларни эгаллаган клублар билан ўйинлардаги очколарининг олиб ташланишига муносабатингиз қандай?

- Ёмон ҳам эмас, аксинча, яхши ҳам эмас. Бу Ўзбекистон футбол ассоциациясининг қарори. Шундай экан, Суперлиганинг барча жамоалари бу мажбуриятни бажариши шарт. Футболимиздаги янгилик ўзини қанчалик оқлашини вақт кўрсатади.

Иштирокчилар сонининг қисқаргани чемпионат савиясини оширди. Бу бор гап. Лекин очколарнинг олиб ташланиши - умуман бошқа масала. Шу сабабли ҳам бу мавзуда аниқ бир фикр билдиролмайман.

- Шаҳзод, жамоадаги бугунги ҳолатингиздан мамнунмисиз?

- Инсон борки, қайси соҳада ишламасин, ўзидан юз фоиз кўнгли тўлмайди. У ҳамиша ўз устида ишлашда давом этади. Футболда ҳам худди шундай. Ўз ўйинимдан кўнглим тўлган куни фаолиятимни якунласам бўлаверади. Шу сабабли ҳамиша ўзимга нисбатан танқидий кўз билан қарайман.

Ҳа, жорий мавсум кам гол уряпман. Табиийки, бундан хурсанд бўлмайман. Машғулотларда бор кучим билан ишлаяпман. Мавсумнинг қолган ўйинларида аввалгиларига қараганда яхшироқ ҳаракат қилиб, жамоам муваффақиятларига ҳисса қўшаман.

Юқорида айтганимдек, ҳали асосий баҳслар олдинда. Чемпионлик ва совринли ўринлар учун кураш сўнгги тургача давом этади. Бунга ҳозирданоқ ҳеч ким шубҳа қилаётгани йўқ.

Манба. "Интерфутбол" газетаси

Шаҳзод Нурматов: «Ўйинимдан кўнглим тўлган куни фаолиятимни якунласам бўлаверади»