Ўйиндан сўнг "ФарДУ" бош мураббийи Шавкат Юсупов матбуот анжуманида иштирок этди.

- Ўйин ҳақида фикрингиз?

- Қўлга киритилган ғалаба билан "ФарДУ" клубимиз раҳбарияти ҳамда мухлисларни табриклайман. Бугун ирода кўрсатишгани учун футболчиларимизга ҳам раҳмат. 0:1 ҳисобида ортда бораётиб учта гол уриб вазиятни анча яхшилаб олдик. Кейинчалик яна тўп ўтказиб юборган бўлсак-да, 3:2ни сақлаб қола олдик ва навбатдаги уч очкони қўлга киритдик.

- Бугун ёш футболчи Махаррам Абелфазов иккита гол уриб жамоа ғалабасига ҳисса қўшди. Шу ҳақда фикрингиз?

- Махаррам Абелфазовни трансфер ойнаси пайтида "Цементчи"дан олгандик. У тезда жамоамизга киришиб кетди ва ҳар ўйинда ёрдам бериб келяпти. Ҳаракатлари чакки эмас, ўз етакчилик қобилиятини намоён эта оляпти. Самандар Ўринбоев иккаласи яхши тандем ҳосил қилган. Қолган футболчилар ҳам бирдам бўлиб ҳаракат қилмоқда, йўқса бу ғалабалар бўлмасди.

- Кейинги режалар ҳақида?

- ФИФА кунлари сабаб қисқа таътил берамиз. Шундан кейин яна йиғилиб 18 октябрь куни бўладиган "Локомотив" билан ўйинга тайёргарлик кўрамиз. Орада битта ўртоқлик учрашуви ўтказишни мақсад қилганмиз.

Шавкат Юсупов: "Махаррам Абелфазов етакчилик қобилиятини кўрсата оляпти"