- Меҳмонда пешқадам "Локомотив"дек каби жамоадан очко олиш катта ютуқ. Бугун ютишимиз ҳам ютқазишимиз ҳам мумкин эди. Жанговар дуранг бўлди. Ўйин якунигача иккала жамоада ҳам яхши вазиятлар бўлганди.

- Бугунги ўйинда жамоангиз ғалаба учун ўйнагандек кўринди. Ўйиндан олдин жамоага қандай гаплар айтгандингиз?

- Уйда ёки сафарда ўйнашимиздан қатъий назар йигитларга машғулотларда фақатгина ғалаба учун ўйнашини тайинлаяпмиз. Кийим алмаштириш хонасида ҳам шу учун борларини беришларини талаб қиляпмиз. Бугунги ўйинда ҳам футболчилар борларини беришди. Иккинчи голдан кейин гол уриб, характер кўрсатишди. Йигитлардан кўнглимиз тўқ, улар ҳар бир тўп учун курашишди. Уларга катта раҳмат деймиз.

- Сўнгги турлардаги сермаҳсулликнинг сабаби нимада? Жамоа "Олимпик Мобиуз"ни мағлуб этди, "Локомотив"дан очко олди.

- Бир қанча ўзгаришлар қилдик. Шу ўзгаришлардан кейин ҳам ишлар ўхшамаётгандек туюлди. Вазиятлар бўлаётганди, бироқ гол ура олмаётгандик. Бу борада кўп ишладик. Сўнгги тўрт ўйиннинг барчасида гол уряпмиз. Голлардан кейин йигитларда ишонч ҳам ошяпти. Ҳар бир ўйинга тайёрланаётганимизда улардаги иштиёқни кўряпмиз. Улар хоҳлашмоқда ва мана шундай натижалар бўлмоқда.

- Бугунги дуранг Сизни қониқтирдими?

- Олдинроқ айтганимдек бугун ютишимиз ҳам ютқазишимиз ҳам мумкин эди. Дуранг ёмон натижа эмас. Пешқадамдан очко олиш биз учун ғалабадек бўлди. Лекин ғалаба қозонганимизда яхши бўларди.

Шавкат Юсупов: "Пешқадамдан очко олиш биз учун ғалабадек бўлди"