Бугун "Локо" майдонида аламли мағлубият қабул қилиб олган "Сўғдиёна" ўтган турда пойтахтнинг бошқа бир жамоасини мағлуб қилгани ёдингизда бўлса керак.

Ўша баҳснинг эътиборга лойиқ бир жиҳатига ҳеч ким эътибор қилмади. Бугун шу ҳақда маълумот берамиз.

"Пахтакор" Ўзбекистон чемпионатлари тарихидаги энг кучли жамоа эканини биласиз. Совринлар, ғалабалар, голлар — борингки, статистиканинг исталган йўналишида "шерлар"нинг олдига тушадигани йўқ. Тарихнинг исталган даврида қандай ҳолатда бўлмасин, пойтахт грандига қарши майдонга тушаётган ҳар бир жамоа биринчи навбатда ўз дарвозаси даҳлсизлигини сақлаб қолиш ҳақида қайғурган. Аммо бу ишни уддалаш барчага ҳам насиб қилавермайди.

"Сўғдиёна" 2021 йилги мавсумда шунга эришди. 1-давранинг 10-турида Тошкентда "нурсиз дуранг" қайд этган Улуғбек Бақоев шогирдлари 23-турда минимал ҳисобдаги ғалабани расмийлаштирди.

Маълумот учун, бундай натижа сўнгги бор 2017 йилги мавсумда қайд этилган эди. Ўша йили Самарқанднинг "Динамо" клуби "Пахтакор"га қарши кечган ҳар 2 ўйинда нолга ўйнаган.

Шунингдек, "Сўғдиёна"нинг ҳимоя чизиғи жорий мавсум Суперлигада энг яхшиси бўлиб турганини ҳам таъкидлаш керак. Жиззах клуби барчадан камроқ гол ўтказиб юборган (14).

Финал олдидан! "Насаф" халқаро майдонда қанчадан бери ютқазмаяпти?

"Шерлар" ёриб ўтолмаган ҳимоя