Марказий ҳимоячи шундан сўнг сайтимизга интервью берди.

- Ўтган мавсумни иккита жамоада ўтказдингиз. Таассуротларингиз қандай?
- Ҳақиқатдан ҳам аввалига АГМК да бўлдим. Аммо у ерда ўзим истаганчалик кўп ўйнамадим. Шунинг учун ёзги трансфер чоғида жамоамни ўзгартиришни истадим. “Сўғдиёна”дан таклиф бўлди. Мавсумнинг иккинчи қисми мен учун кўнгилдагидек кечди.

- АГМКда негадир кам ўйин амалиётига эга бўлдингиз. Бу жамоани танлаб афсусланмадингизми?
- Энди бундан афсусланишдан фойда йўқ. Ҳа, АГМКда деярли футбол ўйнамадим деса ҳам бўлади. У ерда менга шунчаки ишонч билдиришмади. Хатто Осиё Чемпионлар Лигасининг плей-офф босқичида Саудия Арабистонининг “Ал Насср” клубига йирик 4:0 ҳисобида ютқазиб қўйилганидан кейин ҳам ва Суперкубок доирасидан ўрин олган “Локомотив”га қарши ўйинларда қайдномага ҳам киритилмадим. Захирада имконият беришини кутдим. Таркибдаги бошқа ҳимоячилардан кучсиз эмаслигимни исботлашга харакат қилдим. Қайсидир маънода берилган имкониятдан унумли фойдаланиб, бошқалардан кучли эканлигимни исботлаб қўйдим. Аммо бу вақтда биринчи давра ниҳоясига етиб бўлганди.

- “Сўғдиёна”га ўтиш бу сизнинг истагингизми ёки ҳар икки жамоа шунга келишдими?
- Давралар оралиғида Улуғбек Истамович қўнғироқ қилиб, жамоасида кўришни истаётганини билдирди. “Сўғдиёна”нинг таклифи мен учун ҳар томонлама маъқул келди. Кейин АГМК бош устози Миржалол Қосимов билан гаплашганимдан сўнг, кетишга қарор қилдим. У киши иккинчи даврада кўпроқ легионерларга ишонч билдиришини айтди. Шундан сўнг ўйланиб ўтирмасдан, жиззахликлар чорловини қабул қилдим. Билдирилган ишонч учун Улуғбек Бақоевга миннатдорчилик билдираман.

- Миржалол Қосимов ва Улуғбек Бақоев. Қай бири билан ишлаш қизиқарли кечди Сиз учун?
- Ҳар икки мураббийнинг ҳам ишлаш услуби бор. Уларнинг ўзига яраша футболга қараши бир-бирига ўхшамайди. Тактик услублари турлича. Ўзимга кўпроқ иккинчи даврада Бақоев билан ишлаш ёқди.

- “Сўғдиёна” иккинчи даврада тезликни сезиларли даражада оширди. Бу кўпроқ нима билан боғлиқ?
- Назаримда аҳиллик эвазига ютуқларимиз кўп бўлди. Бош мураббий ҳаммани бир мақсад йўлида жисплаштира олди. Маҳаллий мухлислар юқори савияда бизни қўллаб-қувватлаб турди. Шунингдек раҳбарият томонидан ҳам эътибор кучли бўлди. Ғалабаларимиз замирида ушбу омиллар ётибди деб бемалол айтишим мумкин.

- Ҳозирда эркин агентга айландингиз. Келгуси режаларингиз қандай?
- Мавсум якунига етгач, олдимда 2-3та таклифлар турганди. Лекин яна Жиззахда қолиб, “Сўғдиёна”да ўйнашни маъқул топдим. Шу боис жамоам билан яна бир йиллик келишувга эришдим.

Файзулла суҳбатлашди

Шерзод Файзиев: “Сўғдиёна” билан яна бир йиллик шартнома туздим”