Хабарингиз бор, бугун Италия А Сериясининг 6-турига старт берилади. Ҳафтанинг марказий ўйини ҳақида гап кетса, кўпчилик Тошкент вақти билан 21:00 да "Жузеппе Меацца"да бошланадиган "Интер" — "Аталанта" тўқнашувини кўрсатиши табиий. Амалдаги чемпион ва бронза медалининг соҳиби ўртасидаги баҳс.

Лекин эртага ўтадиган "Лацио" ва "Рома" учрашувини ҳам унутмаслик керак. "Рим дербиси" нафақат Апеннинда, балки жаҳон футболидаги энг кескин тўқнашувлардан бири ҳисобланади. Мазкур жамоалар бугунга қадар 176 марта майдонга тушишган. Ўзаро ўйинлардаги устунлик "бўрилар" томонида — 67 ғалаба, 47 мағлубият ва 62 дуранг. Тўплар нисбати ҳам "Рома"нинг устунлигини кўрсатяпти — 224:178.

Бу ўйиннинг биз учун аҳамиятли жиҳати шундаки, илк бор ўзбекистонлик футболчи "Рим дербиси"да майдонга тушиши мумкин.

Маълумот учун, эратага Элдор Шомуродов "Лацио"га қарши 3-ўйинини ўтказиши мумкин. Жарқўрғонлик форвард бунга қадар "Женоа" либосида "бургутлар"га қарши 2 ўйин ўтказиб, 1 тадан гол ва голли узатмага муаллифлик қилган.

Бундан ташқари, Моуринью жамоасида Руи Патрисио, Тэмми Абраҳам ва Риккардо Калафиори сингари футболчилар биринчи бор "Рим дербиси" ҳавосидан баҳраманд бўлиши мумкин.

Умид қиламизки, эртага ҳамюртимиз майдонга тушиб, самарали ҳаракатлари билан эсда қолади.

Таслим бўлма!

Шомуродов тарихда биринчи бўлади!