Ўтган икки кун ичида 10 мингдан зиёд ўқувчи сўровномага ўз муносабатини билдирган. Вариантлар орасида "Мураббий ўзини кучлироқ чемпионатда синаб кўришни хоҳлади" 41 фоиз овоз билан биринчи бўлди. Балки шундайдир. Ким билади дейсиз, Арвеладзени тез орада Европанинг бирорта чемпионатида кўриб қолсак ажаб эмас.

Сўровномада қатнашганларнинг 38 % "Раҳбарият мураббийга катта пул тўлашдан воз кечди" деган вариантда тўхталган. Аниқ рақамлар айтилмаган бўлса-да, грузиялик мураббийга "Пахтакор" яхши пул тўлаб келганини кўпчилик билади. Раҳбарият катта пул тўлашдан воз кечдими? Бўлиши мумкин. Буёғига жамоа кўрпасига қараб оёқ узатсин дейилган бўлиши ҳам мумкин.

"Мураббий шунчаки шартномасини узайтиришни истамади" варианти 12 фоиз билан учинчи бўлди. Айтайлик, Шота Арвеладзенинг ўзи шартномани чўзишни хоҳламаган бўлиши мумкинми? Қачонки кучлироқ клубдан таклиф тушса, кўп мураббийлар шундай йўл тутишини биламиз. Лекин Арвеладзенинг олдида аниқ таклифлар борми? Бу ҳам бир масала.

"Пахтакор" янада кучли мураббийни олиб келиш учун шундай йўл тутди" вариантига 9 фоиз ўқувчи овоз берган. Бундан кўриниб турибдики, кўпчилик "Пахтакор" янада кучлироқ мураббийни олиб келишига аксар мухлислар ишонмаяпти. Янги мавсум стартигача ҳали анча борлигини ҳисобга олсак, балки раҳбарият Европадан номдорроқ мураббийни таклиф этар. Хуллас, буёғи нима бўлишини олий ҳакам вақт кўрсатади.

Шота Арвеладзе кетиши нима билан боғлиқ? (Сўровнома якунлари)