“Йилнинг энг яхши ёш ўйинчиси” номинация бўйича бира тўла уч нафар футболчи эътироф этилди. Жамшид Болтабоев, Иззатилла Абдуллаев ҳамда Акобир Тўраев. Аҳамиятлиси уларнинг барчаси кузда БААда ўтказилган кичик жаҳон чемпионати иштирокчиларидир. Бу йил 18 ёшга қадам қўядиган ушбу футболчиларнинг мураббийлари билан суҳбатлашиб шогирдлари хақидаги фикрларини билишга қизиқдик.

Бухоролик Акобир Тўраев бир неча йил мобайнида “Бухоро” ёшлар жамоасида ўйнади. Эндиликда иқтидорли ҳужумчи асосий таркиб билан шуғулланмоқда. Унинг профессионал футболдаги биринчи мураббийи Шуҳрат Файзиевдир.

- Акобирни “Энг яхши ёш футболчи” деб топилганидан хурсандман - дейди Файзиев. - Иқтидорли йигит. Ўзига ишонадиган, тиришқоқ бола. Унда ҳужумчиларга хос бўлган хусусият бор. Тўраев ҳозирда асосий таркиб аъзолари билан машғулот ўтказмоқда. Унинг бу йил ҳам асосий таркибда ўйнаш имконияти юқори. Асосийси бунинг учун ҳаракат қилмоқда. Ақл билан ўйнашга интилади. Кўпинча ўйинлари билан Улуғбек Бақоевни эслатиб юборади. Насиб килса келажакда миллий терма жамоамиз ва “Бухоро” учун кўп йиллар мобайнида ўйнайди.

- Акобир 1996 йилда таваллуд топган. Шуни инобатга оладиган бўлсак, у учун ҳали ҳаммаси олдинда. Агарда ўз устида ишлашни канда қилмаса, ундан кучли ҳужумчи етишиб чиқиши аниқ.

- Шогирдимнинг камчиликларига келадиган бўлсак, Тўраев бироз қайсаррок йигит. Лекин бошқалар билан яхши чиқишади. Муомаласи ҳам чакки эмас. Шунингдек у тўп билан кўпроқ ишлаши ва рақибини алдаб ўтиб голлар уришни ўзлаштириши керак.

Исломбек РУСТАМБЕКОВ ёзиб олди.

Шуҳрат Файзиев: "Акобир Тўраев Бақоевга ўхшашиб кетади"