Ушбу учрашувдан сўнг мезбон жамоа бош мураббийи Шуҳрат Мақсудов фикрларини билдириб ўтди.

"Аввало Ўзбекистон халқини чин кўнгилдан наврўз байрами билан табриклайман. Соғлик ва саломатлик тилайман. Бевосита ўйин ҳақида фикр билдирадиган бўлсам, осон бўлмаган ғалабага эришдик. Шунингдек, об-ҳавонинг ноқулай келиши ҳам бироз қийинчилик туғдирди. Рақиб жамоа сафида, мураббийлар штабида "Бунёдкор" клубида фаолият олиб борган футболчи ва мутахассислар бор эди. Бу эса уларнинг икки ҳисса куч билан ўйнашини англатарди. Ўйлайманки, футболчиларимиз мураббийлар томонидан берилган кўрсатмаларни яхши бажаришди. Уларнинг шундай чиройли ўйин кўрсатгани учун миннатдорчилик билдираман. Кўрдингиз, бир киши кам бўлиб ўйнадик. Йигитлар ирода кўрсата олишди.
Бугун таркибдаги ўзгаришларга тўхталсак, ротатциялар қилганимиз футболчиларнинг бор кучи билан тўп тепмаганини билдирмайди. Уларнинг қандай кучга эгалигини яхши биламиз.
Иброҳим Томиванинг "Металлург" билан ўйинда гол ура олмагани ҳаммада бўладиган ҳолат. Тўғри, бугун қизил карточка олиб қийин вазиятда қолдирди. Қизил карточка олган вазиятда ҳакам яқин турган эди. Буни таҳлил қиламиз", дейди Шуҳрат Мақсудов.

Абдулазиз Искандаров ёзиб олди

Шуҳрат Мақсудов: "Йигитлар ирода кўрсатишди"