Мазкур беллашувда икки етакчи футболчимиз Элдор Шомуродов ва Отабек Шукуров жароҳат олди. Якунда эса уларнинг иккиси ҳам Лаосга бормаслиги ойдинлашди. Бу борада уларнинг жароҳати ҳақида тўлиқ маълумот олишга муваффақ бўлдик.

"Муҳим ўйинларда етакчи футболчиларнинг жароҳат олиши доимо оғриқли. Аммо бу ҳам футболнинг бир қисми. “Сон ички мушагининг қисман узилиши” ташхиси ила Элдор Шомуродов ҳамда “тизза бўғими ички бойламининг чўзилиши” ташхиси қўйилган Отабек Шукуровнинг кейинги ўйинга олиб борилмаслиги борасида тўғри қарор қилинди.
Остон Ўруновнинг реабилитация жараёнини ўз назоратига олган ассоциация ва тиббий штаб мазкур футболчиларни ҳам тезроқ соғайтириш, шунингдек, шамоллашдан кейинги Машарипов ва сон мушакларида толиқиш сезган Турғунбоевни кейинги ўйингача сафга қайтариш учун зарур чора-тадбирларни белгилаб олган.
Жароҳатдагиларга тезроқ соғайиш, қолганларга куч-қувват тилаб, мухлислик қилишда давом этамиз. Барчаси олдинда",- дейди шифокор, ЎФА тиббий қўмитаси бош мутахассиси Аброр Пирриев ўзининг телеграм каналида.

Маълумот учун, КХДР билан учрашув 19 ноябрь куни 17:00да бошланади.

Шукуров ва Шомуродовнинг жароҳати бўйича тўлиқ маълумот