Бу ҳақда сайтимиз ходими Шаҳбоз Беғамов маълум қилди.

Жиззахнинг "Сўғдиёна" клуби "Насаф" ҳужумчиси Драган Чераннинг хизматларига қизиқиш билдирмоқда. Афтидан "Сўғдиёна" жамоаси давралар оралиғида ўз таркибини кескин кучайтиришни режалаштирган кўринади. "Сўғдиёна" клуби трансфер ойнаси очилганидан сўнг Чераннинг трансферини "Насаф"дан сотиб олиши мумкин. Шунингдек, жиззахликлар "Насаф" ярим ҳимоячиси Азиз Ғаниевни ҳам сотиб олишни хоҳлашмоқда.

Айни пайтда "Насаф"да молиявий муаммолар пайдо бўлган. Бу эса Суперлига клубларининг "Насаф" футболчиларига бўлган иштаҳасини очиб юборган. "Насаф" агарда вазият ўнгланмаса, унда давралар оралиғида футболчиларининг трансфери орқали пул ишлаб олиши мумкин.

Драган Чераннинг хизматларига "Сўғдиёна"дан ташқари "Навбаҳор" ҳамда "Пахтакор" клублари ҳам қизиқиш билдиришмоқда. Тасдиқланмаган маълумотларга кўра, "Навбаҳор" ва "Пахтакор" ҳам Чераннинг трансфер ҳуқуқини давралар оралиғида сотиб олишни режалаштиришган.

"Пахтакор" клуби Черандан ташқари Азиз Ғаниев, Одил Ҳамробеков ҳамда Бобир Абдихолиқовга ҳам бефарқ эмас. Ушбу жамоанинг трансфер шорт-листида айнан шу учала футболчиларнинг номи ўрин олган.

Маълумот учун, Суперлига трансфер ойнаси 15-турдан кейин расман очилади.

"Сўғдиёна", "Навбаҳор" ва "Пахтакор" "Насаф" етакчисини сотиб олмоқчи